NOLAI CAAN

By; Cerboih Pa

Minung zozo khal kan nui' pum sung ihsin kan hungsuakih, voihnih kan suak sal nawn lo ding. Nauhak lai caan a umih, nolai (thatlai) caan a um, pitar/putar caan khal a um fawn. Caan kan hman lian zo mi cu kawhkirsal a theih nawn lo ih tu ih kan hman rero lai mi caan khal hi a herliam rero, kir khal a kir sal dah nawn fawn lo. Leitlun ahhin nun pakhatte lawng kan neiih cu mi cu ziang/zo ih hrangah saw kan hman le thabik ding?

1. Caan Khat Te Lawng
William Shakespeare cun, “hi leitlun hi lemcannak hmunpi asiih, mah le caan tete ih lengcangtu (actor & actress) an ra lang vekin, leitlun minungpawl hi caan hman kan sawngaw rero men a si. Kan caan a cem cun kan kirsal dah nawn lo.” Tiah a rak sim dah. Kan nolai caan hi voikhat te lawng a si dingih, kan nolai caan(vanglai ni) a liam cun, kan no sal nawn lo ding. A sunglawi zet mi na nolai, na cahvah lai le na thatlai/mawi lai caan hi ziang tuahnak ah asilole zo ih hrangah na hmang liam ding? Na caan neihsun hi ziangti vek in na hman le a thabik ding ti kha thaten ruataw sal aw.

2. A Rei Lo Ding.

Tu ih kan nulepa, pitar le putar pawl tla khi a hlan ah cun nangmah le keimah vekin mino, mi cakvak le mi hmel thatha an rak si ve dah sokhaw! Hmansehla an theih man hlan ah tar dinhmun an rak thleng ziar zo khi a rak si. Atuih minopawl khal hi Caan reipi kan no ringring lo ding. Kum le caan, ni le thla, nazi pawl, an cawl ve dah fawn lo. Na neih mi Caan pakhat te, na no lai caan ih Pathian thei lo le a hna tuan mumal lo ih na caan tha na liamter pangah cun sirawksal a thahnem nawn lo ding. Tu ahhin ziang/zoi' hrangah saw na nun/caan na hman rero? Fala/tlangval nomnak le zulesa nomnak hi rei lo te sung hrang lawngih nomnak men a si, nomnak taktak an tling lo. Leitlun nomnakpawl hi cu kanmah in siatsuahtu, thinharnak le beidonnak in thlensaltu men lawng an si. Cuhnakin a nunnak tiang a lo pe siangtu Jesui' hrangah na nun hmang ve thlang aw! A liamzo mi cu ziang ti tha, tu ihsi tal in na kir sal thlang lo ding maw?

3. Tu Hi Caan Thabik A Si.
Kan no lai le kan parmawi lai caanah piangthar loin ka duhduh ih caan kan hman liam mei ding hi phan a um tuk lawmmam. “Ka thih hlan ih ka pianthar le a tawk zo, pacang/nupinu ka si tikah Pathian hrang ka nung leh ding” ti pang hlah aw! Ziangtikah kan thi ding ti zohman in kan rel cia thei lo. Piantharnak ding le Pathian hnatuannak ding ih caan thabik cu kan thatlai caan ahhin a si. Kan nun sung caan ih kan caan thabik miangmo cu kan no lai caan te hi a si. Ziangtik hmanih siraw a um dah lo ding mi cu kan nolai caanih Pathian hrangih kan tikcu, kan fimthiamnak le kan thazang kan hman suah mi hi a si. Nang mino, na nolai caan hi Pathian hnatuannak ding hrangih caan sunglawi le thabik a si sokhaw!

A Netnak Ah
Thusimtu 12:14- Pathian cun ziang hmuahhmuah kan tuahmi parah thu a then ding; a òha siseh, a sia siseh, a thup teih kan tuahmi par tiangin thu a then ding a si.
Duhdawt mi KCP minopawl, thil tha lo na tuah rero mi hi maw, a liamhlo men lo ding, thiltha na tuah mi khal kha a cemral men lo ding sokhaw! Kawhhran le Khawtlang hrangah ziang mi thiltha na tuah zo? Kan no lai caan hi a tha theibik in hman zuam uhsi!