K.C.P LE ZATLANG NUN Part 2

    By Vannun Thang Pu

4.Miphun Tul Mi Thil
Khawitawk hmun le ziangvek thil khalah, minung pawlkom(Society) pakhat a din hnuhnu cu sumlepai, thilri le pawitul mi tampi a tul theu. Cubangin kan K.C.P khal in hmailam hrang khua ruatin, innsang tinah, kum tin in sum khawn(khuan)nak neih ringring theu a si. Tuihnu lam khalah a tul dan izirin, khawn ringring hrih lai ding a si ko. Kan hruaitupawl in mai innsang hrang hlawknak um riai lo mi thilah, hreh zet cingten sumpai le thilri khawnnak neih theu a si. Cuvek caan ah mi hrekkhat cun kan remcang hrih lo, ra sal uh ti men loin, tongkam mawi lo taktak hmangin an rak cam, an rak hro theu ti thu tla theih ding a umih, riahsiat umza a va si lawmmam so. Kanmah (K.C.P) ih pawi tul mi thil, a sungum miin kan tuani kan pek loah, zoinsaw in tuansakih in pek sak ding, khua napi ih kan ruah a tul. Kan pe thei lo a si hmanah a khawntupawl tihzah upatnak thawn, tongkam mawi tak hmangin kan rak sawn theu ding a si. Midang pawlkom(Sosiety) cu an tangruali, an thangso deuhdeuh hmuah kan ti si, mah hmuah tanrual kan tum cuang lo si lo ahcun, kan nun cu sullam nei lo tak a si ding. Innsang tin in malte ciau kan pek mi le kan burkhawm mi kha hmunkhat ih a finkhawmawk cun, tampi ah a cangih, miphun cangvaihnak thil ropi takah a cang thei a si. Tuihnu ah cun zokhal miphun cangvaihnak hrangah kut sup mei loin, tanlak dan thiam tlang ciau dingin kan sawmaw a si. Tanrual cu cahnak (union is strength) ti mi thu hi kai hnget ciau uhsi!

5.Hrinhnam Tete
Tuisan mi tampi thinlungah a huapkau zawng hnakin a ciip(fiak) thei patawp i, cangvaihnak le zohkhenawknak lam a tam vivo. Biaknak lam kan zoh tik khalah pawl(Denomination) fate dinih, pawl pakhat ta ruk(fir) sakawk, mahte ti khawm hlethlo, khurbing taki khawsa khal tampi hmuh ding an um. Falam khua ih tlawng kan rak kai laiah mai hrin hnam tete a dangdangah nomawknak(puai) tuah ciau a rak si. Cui thil cu ka zohsal tikah mai hnampi theihawknak le sungkhat sarawknak asiih, a tha zet a bang nan, khatlam ve thungah cun, laimi kan zaten suakkhat unau kan sinak siatsuahtu pakhat si hin ka thei. Cuvekin kan miphun (K.C.P) sungah lungput fiak(bi) zet neiin, mai hrinhnam te lawng fingkhawi duhnak nei i, cangvai kan um pang ding ti hi a phanum nasa. Minung hi a kau theibik, a tam theibiki pehzomawknak thawn hnatuan ding kan si. Leitlunpi kan zoh tik khalah mahte ukaw cozah(government) tampi um hmansehla, cuhnakih tum le kausawn U.N (United Nation) hmangin pehtlaihawknak le pawlkomnak neih a si thotho. Kan kawlram cozah hin a tumtah mi pakhat cu State pakhat ih um tlang khawm mi kha an pumkhatnak siatsuah duhah, mah le hrinhnam ciau lam le nunphung cangvaihnak nei ding hin a tawlrel. A tumtah mi cu an lungrualnak a siat dingih, anmah le anmah ngaihaw lo hai seh ti duh ruangah a si. Hrin hnam tete kha thupi zetah ruatin a dang teih thilti (cangvaih) nak kan nei(tuah) asiahcun, K.C.P le zatlang nun siatsuahtu ah kan cang thei. Laimi zate hmunkhatih kan pehzomawk hi a tha in a tawk a si. A tul ah cun hi hnaki kau khalin a si vivo lai ding.

6.Siatsuahtu Pangang(Nathrik)
Lo thlopa in thlairawl a ciin tikah a that ding zat tha thei lo dingih dawnkhamtu an mai sung isin le a lenglam isin eisetu (siatsuahtu) Pangang(nathrik) an hawng suak theu. Cubangin kan miphun (K.C.P) a thanso ding zat thang thei loih, dawnkhamtu hi kan mai sung lala isin a hawng suak thei ti hi kan ralrin a tul nasa ding. Minung hi a thazawng (positive) ih cangvai mi an um bangin, a se (thalo) zawng le dawnkham zawng (Negative) ih cangvai hrimhrim tiin kan um. Cumi ah cun kei teh hi mi thahnem(tangkai) zetih cangvaitu maw ka siih, pawlkompi hrangih hnoksak le siatsuahtu saw ka si, ti hi kan zohhliah(check) awk ringring a tul ding. Kan miphun hrangih rinsan tlak le mi tangkai kan si lo hmanah, midang thanau tertu le dodaltu si lo hram kan tum ciau a tul. Tuah that lam cu a har zet nan, siatsuah lam cu thil awlai te a si, ti kan theih ciau kha! Kan miphun siatsuah theitu sunglam lenglam in, a um thei ringring ruangah, hrihrual bangih fek tei kan tanrual thiam a tul nasa. Hruaitupawl in an tlin tawk in hmai hruai sehla, mi senpipawl khal in, hruaitupawl dungah thulunnak le teimaknak thawn ke kar tlan ciau kan zuam pei. Cuti lo cun, kan ralrin lo laiah kan pumkhatnak le cangvaihnak siatsuah in a um pang ding. K.C.P hi zo ih ta hman asiloih, a sungih um mi kan zate ta a si ruangah, a humhimtu ding le tanlatu ding khal midang tuanvo siloin, kanmah rori kan si. Na innsang hna kha nangmah in na tuan lo cun zohman in an lo tuansak lo ding tihi, leitlun kan damsungah a dik ringring ding mi a si.

SENTET LAI KA NGAI

                                                   
Khuanui’ lairel samhri sih in
Nupa cang in hrinhniang ka suak
Nuam in ka tawi sentet lai ah
Co tawk teah, lung hmui siamsin
Ei caan ah ei, ih caan kim ziang thei lo’n
Sual mawh thei lo, nuam sualmal in
Ka ngai ruangmang, sentet lai kha

Ziangrel loih, nun khua sa in
Tu cu an ziam, kirsal loin
Ziangaw ti tha, hri bang temtawn
Saduhthah bang kim thei si lo
Lung bang mitthli, van rialruah thawn
Lam bang kirin, ra suak sal law
Ka ngai ruangmang, sentet lai kha

Ruahnak lungthin, thiangfai te kha
An hlo an ral, kum hawng thang in
Duhnak a sang, ruah mi a tam
Ziang thahnem lo, kim thei lo len
Rua bang tuai in, nawlh sal ka duh
Cang thei sehla, nawm lai caan te
Ka ngai ruangmang, sentet lai kha

By; Congthu Fa

MILIAN BIK PAKHAT THAWN

                  
By; RC Tuallawt
Mai khua a rak si thawn, hla tuk a rak si fawn lo, Pastor pakhat ......... i crusade cem zan cu ka va khawm ve e ka ti i. Tonak dunglam deuhah to in, kiang le kap zoh dukdo in, Fala mawi deuh ka hawl hrukhro. Stage lamih pacang calngolh to pawl ai cun ka sir lamih, samthlai remte pawl cu zoh nuam ka ti sawn deih. ka lolam ve tak si.
Cui caanah ka kiangah mi pakhat, ka hmel theih khal si lo hi, a ra to ve. Cu Pa'i thuhla cu si, lo sim ka duh mi cu....

A jeans bawngbi hruhmi cu a thar laiah ziang vek zawng (rawng) a si ding ti ka ruat suak thei lo. A kut zung dum hriaphriap cun hnatuan khungkhai le harsa a tuan ti cu Pastor pa suh buai ttul lo'n ka thei mei. Kawr hlum rang vek nawn a hruhih (vek nawn ka ti sullam cu a rang a si maw, si lo ti proof-nak ka neih lo ruangah a si). Vun zoh men hin duk a ti dul ih, a rim vun hnim sehla a thu hmerhmo ding ka zum. A kedam bun mi le Made in Noah sanlai si awm tak in, rawng mumal khal a nei nawn lo.
Ka kiangih a ra to cu ka lung a awi in, vantha ka ti aw lamlam. si ko.. a hmel le a lang daan in, i sunlawih tuk in ka thei aw. Mi farah vuak thah ding ti khal sehla, kei ai an thawi that hmaisa ding ti ka thei. Ka hmel sinpi lem lo khal a kiangah cun ka lang mirang sutsi male.
Khawm an vun thok ih Crusads hlabu No,9 nak an vun hrilih ding in kan vun sak. Kan vun ding tlang tla cu, leitlun ah hin bangaw lo tak kan si. I vun ngam ve vel sehla cu hmun le hmun ah lei dailo van dailo in ka sep thei ding ti, keimah le keimah ka sim aw si cu.
"Maw, duhdawtnak a va thuk em! Mi sual bik khal, in duhdawttu; Camsiat mi cross, ka hrang malsawmnak.. Van Bawi bik thihnak, ka hrang damnak"
tiin kan vun sak cu, Hallelui, Amen thawm a thang nasa. In ti thupi fun nawn in, ka sak derdo laitak ah si, in ti kekkuai tu thil cu a ra thlen. Ka kiangih to pa cu a kut van lamah phar suak in leh, a biangah mitthli fawr zutzo cing in......
"Maw,duhdawtnak a va thuk em Ka sim cawklo,
 in duhdawtnak Ka aw neihmi, 
na hmin sunlawinak ah 
In duhdawttu Bawipa, ka lo duhdawt"
tiin thir derdo cing in hla cu a sak. Amah cu ka vun zoh, mak cu ka ti a si. Hi mihlolak pa hin Pathianih duhdawtnak cu ziangvek in si a ruah ve, khanglang in? "Ka sim cawk lo, in duhdawtnak" timi le a bawngbi pop ka vun zohthim hin, mil hi ka ti thei remrem lo. Ziangtin si hi tluk sinak niamih um cing in,"in duhdawttu, Bawipa ka lo duhdawt" a ti thei mei?
"Maw, duhdawtnak, a va mak em!
Ka siar cawklo, in zohkhennak"
  ti kan vun sak thlen cun, ka sak thei nawn lo.
Amah cun ka vun zoh salih.... Pathian in a zohkhennak cu a siar cawk lo maw? Siar ding teh a nei sawm? Tuizan a ra hruh mi hi a hnipuan thabik a si hmel lai lai. Khawmnak ding hrang hman hnipuan tha nei lo hin 'ka siar cawklo, in zohkhennak'a ti maw? A parah Pathian in a zohkhennak pakhat hman ka hmu lo. Mi aa tom a si lo cun, hi pa hin ka theih lo mi thil pakhat khat theih mi a nei a si ding a?
Ka hnipuan hruhmi ka vun zohih, mankhung nawn an si. Hmanseh ka lung a awi si lo. Amah cu ka vun zoh salih, a hmai khing rumri lakah mitthli ra luang mi cu mak ka ti. Van lam a vun zohih "Bawipa... in ngaidam aw" tiin a aihram. Vei lehkhatah ka thinlung cu a sun kuai thluh ta a si.
A hmel ka vun zoh sal cu tleu sersi in ka vun hmu, hi mi farah tlangval pa hi, kei ai a rak lian sawn daih a si ti ka vun thei fiang. Ka ning a zak, hla ka sak ngam nawn lo. Ka thinlung cu a kekkuai thluh ih, ka tap suak ta a si.
Aw lei le vanih, thu neitu Cross parah tii hal in a au kha Vanih Bawibik, Caw rawl peknakah Ziang dang ruangah a si lo, keimai ruangah....

Editorial

January & February , 2018

Kumhlun 2017 cu liam in, kumthar 2018 kan thlengsal ta! Leitlun zawi fa hmanih an hmuh hrihlo mi, milian, farah, mitum, mite bangrep ciarih in hruai thlengtu kan Pathian cu thangthat siko seh. KCP TLANGAU ca siartu nan zapi parah Pathian hmin in kumthar cibai kan lo buk.

Jeremiah cun ti hlohralih kan um lo hi, Bawipa'i zangfahnak, a lainatnak cu a kang dah loih, a tharsal ttheu zingtin in.. a rak ti. David Siangpahrang cun ''ka zauih, ka itthat, cule himte in ka tthang sal, ziangahtile Bawipa in i kilveng'' a ti. Tikcu liam zo hnu cu kawhkir le danglam ter thei kan si lo hmanah, tikcu ra lai ding mi cu tha sawn le ttangkai sawn i kan hman theinak dingah kan tikcu liamzo hnu cu kan nunih THLALANG ah hmang in zir thiam cio uh si.