FALA ZUK PAKHAT

By: Salai Bawisiamthar Sunthang

Zankhat cu sunih ka ihthah rei deuh ruangah mawsi si ding, ka itthat lohli thei lo. Ca siar ding inle kan battery a low deuh ruangah meisa a eng tha thei tuk lo, facebook online dingin le ka Phone top-up a rak cem ngelcel fawn, cutin ka ihnak ihsin ka tho ih ka hung to. Thu tampi ka ruah man hlanah ka nupi a hung tho ve. “cerboihpa cu na itthat thei lo mawsi”? “umm.. tivial lawng in ka sawn, “Keikhal ka itthat tha thei lo, thuanthu in sim awla, cutin ka itthat sal ding,” in ti. “Ka paih ding mawsile, cubak ah thuanthu sim ding khal hi ka thei ve vak lo pi” ka ti nan.. phuahcop thuanthu khal in sim men aw tiah in ti vivo ruangah, keikhal in cuti asile thuanthu tawite ka lo sim ding aw! Tong suak loin a lu a su ih, cutin FALA ZUK PAKHAT timi duhdawtnak thuanthu cu sim ka thok.

Kumhnih hrawng cu an neihawknak a rei ve thlang. A pasal cu cangan paih zet le music lam ngaina zet mi a si. Caan lawng a neih tinten ca a siar, a ngan, a caan le hla a ngai, a phuah ih a sak theu. A ca ngan mi cu a cabu in suah mi tla a nei dah zo, thu tawi tete a ngan mi tla cu facebook lam ah tla a post phahphah ve theu. Amah cu mi ih ngaisan tuk mi le theih lar tuk mi cu a si lo. Midang hnakih thiam hleicet mi nei lo khal sehla thiam lo mi taktak khal a nei lo si hi, ti ding khopin thiam mi a nei tam zet.

A nupi cu ruangrai ah le hmel that lam ah cun sawiselbo an ti vek rori in a famkim ve zet. Asinan a thinlung cu a tha ve vak lo nasa si ding, a pasal cu zah lo le upatnek nei miah loin a duhduh in tirh a fial, ziangtivek lai caan khal ahhin a phun, a kawk ringring si deuh bik mei. A pasal cu mi nunnem le mi tha tuk a si ruangah tong(sawnkir) lo ten a rak ngai liam sak men theu.

Zing khat cu;

Nupi : ziangruangahsaw tuisun cu kan puanpawl hi na sawpfai thlang lo ding? tipsun ah mikhual kan nei ding ti ka lo sim zo si.

Pasal : huiha, tuisun le thaisun cu ka man lo. Meeting thupi tuk ka neih thu ka lo sim zo kha..

Nupi : hmm.. man lo, man lo ti lawnglawng, na thil buaipi mi tamsawn hi cu innsang hrang thathnemnak um der si lo. Kawhhran le khawtlangih na hna(tuanvo)pawl hi bansan thluh thlang awla tha ding.

Pasal : ziangtitha maw! Man lo caan a um vekin man caan tla um theu tho sisi..

Nupi : tuini cu feh lo men awla si mei, ka lo fial mi na tuah lo ahcun na cak lo vio ding.

Cutin pindan lam pan in a pasal ih meeting minute cabu pawl cu a hlon darhsak theh. A pasal cu sunvu an committee nak ah thinnuam lo le mithmai tha khal pu thei lon caan a hmang.

Zaan ih a cuu an pa cu ihkhun khatlam tlangah, an nu khal khatlam tlangah dunglam hawihaw (34) in an it. Zohman tong loin caan tawk fang an um hnu ah;

Pasal : nupi thu thaten kan rel tlang a tul thlang ding.

Nupi : ziangthu hman lo relpi ka paih lo. Hlawknak um lo mi na hna pawl kha bansan awla tawk si mei.

Pasal : ziangkhallole kan thenawk mei a tul thlang ding si hi. Ti ngaihnak dang a um nawn lo. Ka khop tuk thlang.

A pasal ih thenawk thu a tongsuak mi a theih  veten, a thin phang dukdi, a mangbang tuk, umngaihnak le tong ding khal thei loin a um. Naa pi ih vun cum ciamco a cak zet nan, a supaw tento. A pasal cun a paisa bawm sungih a ret mi FALA ZUK PAKHAT  cu a hun phorhih zuk cu zoh phah in; “hi nu hi cu fala duhum, nunnem zet le mi tha tak a si. A thinlung put le a mizia khal ka duhthusam rori a si”. A nupi ih thinlung cu hlingsun mi bangin a rak naa, a mitthli a rak tla. A pasal cun tong a peh vivo; “ hi falanu hi cun in duhdawt ih in ngai thei emem fawn a si” a vun ti cun, a rak thik tuk, keikhal in ka lo duhdawt ve tuk sisi, curuangah si ka lo neih i, tiih vun sawnkir a cak tuk nan. A pasal cu a tong a peh vivo: anih cun hnatuan ih ka buai tuk caan le ka man lo zet caan khal ah in theihthiam sak thluh thei ding ka zum.

A nupi cun thu a rak ruat, malte cu thiamawklonak a nei ve deuh non nan, zianghman a tong suak ngam non lo. Himi fala zuk hi keimai hrangah keimah rori ih ka zuk mi a si, na zoh duh maw tiah an nu cu a vun sut betbet. Zianghman a tongsuak thei lo, a pasal cun zuk cu a nupi ih hmai zawn ah a hei thlir. A nupi cu a thinheng tuk, a pasal ih kut cu a vei thlaksak  hnuah tap phah in a hmaiah a beng hlukhli ih naapin a cum ciamco. A pasal cu daiten a um men, zuk cu a sar ih a thaten a ret sal. A nupi cu puan lukhuhaw in a it hlunhli. Cutin a pasal cun meisa a mih hnu ah a ihthah san. An nu cu itthat thei lon a hung tho luamlo ih meisa cu a hun hmet eng sal.

A pasal tihzah lo le a thu ziang siar loih a rak um danpawl a ruatkiraw sal ciamco thlang. A sirawk zia sim dingin le ngaithiam dil a duh ruangah a pasal cu kaihthawh a duh, a thang ngam ciah ngaingai fawn si lo. A mitthli hnul phah rero cing cun a pasal ih fala zuk pakhat a retthat mi cu zohsak a cak tuk. A thupten  zuk cu a vun dirsuak zurzo, a vun bih ciang cu!! duk.. duk.. duk.. tiin a thinlung a phu depdo. A mang a bang tuk.

Zuk ih a hmuh mi cu amai falat laiih a tlangvalpa(tuih a pasal) in a rak zuk mi kha a si. Um dan a thiam non lo, tah le hnih cem phah cun a pasal itthat lai cu a vun hnam cukci!! A pasal cun a rak hnihsan, a pasal cu itthat der menmen hi rak si in…

Duhdawtnak cu mi famkim kan ton ruangah si cuang loin a famkim lo mi kha a tuah tha famkim sawn theu a si. Zohman kan famkim thluh lo nan, duhdawtnak ruangah kan hmu famkim aw thiam sawn hi a rak si. A cem!

A dik maw? Ngai nuam na ti zawng a si maw? Tiah ka nupi cerboih-nu cu sut phah in ka vun zoh, a rak itthat thlepthlep zo. Ihhmu thaw, mangtha le ti phah in ka itthat ve.