K.C.P LE ZATLANG NUN Part 3

                           By Vannun Thang Pu

7.Theihnak Lam

Thufim pakhat ah cun “neih lo hnakin theih lo a pawi deuh” tiah a um, a si rori, theihnak kan tlaksam tuk cun, midang thu sut ringring, thunuam relkhawmnak khalah midang thurel mi a va ngaitu si ringring, midang hnenah thu thar ka sim ti um dah kel lo rori cu a cang thei lo. Thil tampi nei khal sehla, a tuah dan, a hman dan, a thawt dan le a mawi dan ding kan theih lo ah cun kan thil neih mi khan kan hrangah thathnemnak a nei mal viau ding. Minung hi thu kan theih thei dan le cinken theinak (memorial) hi a can aw lo zet ti cu, zohmanih el theih asilo. Kei cu ka thluak a tha lo tuk, ka cingkeng thei lo, teimak man a um lo tiih kan daithlan asiahcun, kan theihtheinak le cinkentheinak kha a siatin, a niam vivo thei. Thei kau ti le thei tam ti hi thil bangaw zik a bang nan, malte danglamnak an nei. Theikau timi cu leitlun pumpi huap (Global) thuhla le thil a phunphun, a hla le nai ti um cuang loih, theih vivonak kha a si. Thil a phunphun timi cu- sport lam, harhdamnak, doawknak, political, thilmak a phunphun, zirnak lam le thil dangdang tla theih vivo kha a si. Thei tam menmen cu mai umnak kiangkap thuhla, sapel thu, lo hnatuan thu, khawsuang thil thleng mi tivek tete theih men kha a si. Khavek kha cu “a fimnak in hnarpawn a lan lo” an rak tivek fang kha a si. Kan kiangkap ih thilumdan kan theih men kha a tawk loih, cuhnakih hla, kau theih a tul. Thu kan theih mipawl hi belhciandawl le a dik mi a si a tul nasa. Theihkauhnak (knowledge) tha kan neih theinak dingah cun, cabu thatha kan siar a tulih, thuthang a phunphun kan zingzawi le hliakhlai paih a tul ding. Kan K.C.P hrangah thu thar, tuahdan thar (idea), thansonak a phunphun simtheitu le hlawm theitu kan si theinak dingah, kanmah le tlintawk ciau in theihnak lamah ke kan kar tlang ciau pei.

8. Nun tu khawsak

Leitlun kan nun sungah ei le in, sum le pai, hni le puan tul mi tampi kan neiih, cu mi cu kan ti thei tawk ih tuan le hawl ding kan si. Tuan rero, hawl rero nan hlawhtling thei remrem lo, nun khua ong thei lo rori khal hi a um theih. Mi hrekkhat cu an tuah le tuan mi sunah, thlawsuah dongi thangso mi le neinung zetih a hawng um mi khal cu siar cawk loin an um ve. Kei cu ka hlawhtling thei lo emmei tiin tuan lo le hawl lo i kan um cun, a rei hlanah puansia kan sin mei ding. Tuan le hawl nana cu midang bangih an hlawhtlin luailo lo hmanah, ei le in ding te tlasam loin an nei ngenge a si. Minung hi kan hmuingilnak zawn ciau tla hi a bangaw lo ih, kanmah le kan hlawhtlin thei mi hnatuan hi a thabik mi cu a si. Ei kan hmuh theinak ding a si phot ahcun, ziang hnatuan khal ningzahthlak a um cuang loih,  hna tenau ce le tha lo khal a um cuang lo. Hna kan tuan paih lo ruangih ei nei lo, tlasam kan siahcun, zohman ih zangfah kan hlawh lo dingih, in direm sawn ding. Tuan le hawl rero cing nan, nuntu khawsaknak si rem thei cuang loih, kan um thotho asiahcun, kan mai mawh asiloih, midang zangfahnak khal co tlak nun a si. Kan kiang le kap ah nei nung taktak, milian tampi hmuh ding an um, cu mi lailak ih nunhar hnianghni tei kan um ahcun tha a nau i, nun khal hi paih um lo vek ah a cang theu. Asinan beidong lo ten kanmah le tlintawk ten teima tak le tanlaknak lungput thawn hna kan tuanih kan hawl tento asiahcun, nikhat ni ah, mi vekih neinung tak kan va silo hmanah, mangbang anhai tuk loin khua kan sa ve thei ding. Kan K.C.P sungah milian le neinung deuh kan tam vivo asiahcun, tong le sim rero tul loin, kan kiangkap minungpawl in in zohso dingih, mi upat miah kan cang mai ding. Zo khal tha se lo ten mai innsang le miphun hrangah, thinlung hnget tak nei in zuam sinsin uh si.

9. Zir Thiamnak

Nui pum isin kan hawng suah tikah thiamcia mi malte thawn khawvang kan hawng hmu ih, khua kan sa. Ziangtinkim deuh thaw hi kan zir cawp mi le kan thiam thar mi an si deuh thluh ti sehla kan ti sual tam lo ding. Mi tampi cun zirnak tlawngih cazir kher hi, zirnak umsun hmang kan ti ih, tlawng kan kai lo cun zir lo ah kan ruat aw theu. A si lamlam lo, mifimpawl in, kan suah pek isin kan thih ni tiang, zirnak hlir in a khat an rak ti a si, a dik nasa. Tlawng ih ca a zirtu in tlawngih a zir mi lawng a thei(thiam)ih, king le kap ihsin zinghman a zir bet lo asiahcun, a zirnak cu a hlawhtling kan ti thei lo ding. Nitin sunzan mei hin a zir thiam tui hrang ahcun, kan kiangkap thil umdan le mi cangviah dan ihsin zir ding hlir in a khat. Lenglam ih hmuhtonnak (experience) isin zir nak lam hnakin, a sung (tlawng) ih zirnak lam zoh tlang sehla a tha ding. Nulepa tampi in kan ruah sual theu mi cu, kan fa le tlawngkai ding rual an si laiah, an thazang haheuh (hnatuan) ruangah tlawngkai tir loin, hnatuan lamah kan sor sawn riangri theu. Cu mi in a hrin suah mi cu kan ril i rah kan fa le kha, cathiam lo le mi bang lo ah kan can(tuah) tinak a si. San tiluan a her cak laiah, cathiam lo kan si ahcun, mi ti thei mi kan tuah thei lo lawng siloin, mi hleifuan dinhmun ah kan ding tinak a si. Tulai san ah cozah le company ih hnatuan ding cun, a niambikah phun(10) tal on a tul. Lungawi um zet pakhat cu kan K.C.P sung isin hramthok tlawng lawng silo, phun(10) ong le degree (Graduate) tiang kan nei ve thlang hi a si. Asinan cathiam kan neih mipawl hi miphun (K.C.P) le kawhhran ah sawrtlak, mi tangkai an mal deuh hrih lai a bang. Ziangtluk cathiam in, degree ngah(nei) liailiai khal sehla miphun le kawhhran ah hmantlak kan si cuang lo ahcun, thiam lak men, zir lak men kan si pang ding ti a phanum nasa. Khawtlang (K.C.P) le kawhhran hruai theitu mithiam kan va tul lawmmam ve.