RC Tuallawt
Ka
pa hin motor cangsual ruangih i liamsan hnu karkhatnak a si ih,thlahawknak thu
kamkhatte hman sim man lo ih in fehsan thutthi ruangah le ka nu in kum 9 lawng
ka si laiah in rak fehsan ve zo thawn ka um a har zet. Ka nun cu zianghman lo
vek le keivek ih tuartu an um ka zum lo. Kan inn sung khuitawk khal hin ka lung
in len ih,zohnak i piang ka pa'n sulhnu thluh an si fawn,fur ruahsur tum nikhua
dupdawm le lung ti leng tawkfang in a rak um bawk thawn,ka nun cu umhar zet in
a um.
Ti
ding ka theih loh tuk ruangah ka pa'n roomah ka va fehih, a room sung cu a
kelte in a um lai. Room sung ka zoh kual rero laiah phartlang parih Tawh(key)
thlaimi cun ka mit a la zet. Ni dangah cui Tawh cu ka rak hmu dah ngelcel lo.
Cui Tawh cu la in, ka pa'n sulhnu hmuh ruahsan in ihkhun sir ih Bizu cu ka vun
ong. A sungah pawhdawh pakhat a rak um. Cui pawhdawh ong nak le ka ken mi
Tawhfung cu a mil aw cekci. Vun ong ka tum nan a ong aw thei meimei lo. Caan
reipi an ong nawn lo ti a theihtheih zet. Thinsau suah in ka vun ong tum vivo
cu a run awn țetțo ih, ka vun ong thei. Ka lungawi daan cu.
A
sungah cun cahnah thupit hmel zetzet a rak um hnuaihni ih, cu ca pawl ka kau
rero lai ah cun Diary cabu bang nawn, tum tuk lo hi ka vun hmu. Cabu dang khal
zoh nawn lo in, cui cabute cu ka laih, itkhun ah to in ka vun siar. Ka pa'n
ngan rori a si ti cu a kut ngan ihsin ka thei. Cahnah hmaisa bik ah cun
11,September 2002 ti fiang zet in a ngan aw.
"Ka
rualpa'n pa damlo veh ding in ka suak. Sun ah hnatuan ttul ka neih ruangah zing
ah va len thaih, ka theih ruangah, nazi 7 hrawngah an inn ka va thleng. An inn
sung ka va lut cu ka zum ban lo thil ka va hmu. An inn sung tohkham parah
nauhak kum 5 hrawng ding, ttawl le raam deldelte hi a rak toih, thu ruat nasa
le ngaimi a nei ti theihtheih zet in sangkate lam cu a zoh. A mit sungih
mitthli ka hmuh phei cun thildang khal ruat nawn lo in,a pu dam lo ngai in a
ttap a si ding ti in,a kiangah ka va to. Ka vun bia nan mi sawn hna khal a
thiam lo. Țihmi nei vek in i fehsan ziar a si cu. Ka thil hmuhmi cu mak ka ti
zet ruangah a sungkua pawl ka sut nan, zohman nih in sim fiang duh lo cu mak ka
ti sinsin. Thinlung nuam lo zet cing in tawkfang ka to hnuah tlun zai ka rel.
Ka khuaruahnak lawngte a tap ta. Ka rualpa le in sungsang um daan cu mak ti zet
in theih fiang ka cak zet"
Diary
dang bang lo zet in a dangah cun Ni Thla a lang nawn lo. `Zo si ka pa in ka
rualpa a ti mi cu si ding?cui nauhak cu zo a si ding?' Theih vivo ka cak
ruangah ka vun siar peh sal.
"A
thupte in cui nauhak i thuhla cu ka hliakhlai vivo ih,ka thil theih mi cun ka
thin a ti nuam lo zet. Cu nauhak cu Bawite (van bawi hngak) si in, a nu le pa
an tthen awk hnuah, a nu in pasal dang a nei san. A pa (ka rualpa ih naupa) cu
rittheih sii ruangah thawng a tla ih, ka rualpa te nupa in kilkhawi in Bawite
cu an fa le thawn kawmaw tawk fang a si. Tikcu remcang ka neih hmaisa bik ah ka
rualpa'pa damlo veh ti phualam ah hmang in ka va leng sal. Cuittum ih ka thil
hmuh mi phei cun ka thin a ti heng in ka thin a ti naa zet. Zingpit ih feh ka
si ruangah ka rualpa tla cu a tho hrih lo. Zing rawnhru(tayisa) an rak ei zik
hi a rak si. Nu bik cun rawl kio (amai kio maw ticu ka thei lo) cu Kheng ah a
vun zem ih, Kheng pakhat cu mal te in a vun ret, "VanBawiHngak hi na rawl hi
ra la aw, inn leng neih laiah zangfah um ding in rak um ciamco ttheu hlah"
tiin rawl malte cu a vun pe. A thil ti daan cu mak ti in ka rak zoh ringring.
"Ziangah rawl malte lawng na pek ih,a deih lo le sisi lo" ka vun ti.
Nu bik cu"khazat hlei a ei thei lo pi" a ti men.
Cui
nauhak cu ka vun zoh ih rawl malte ih pumpuar mei ding khi a bang lo tuk. A
rawl ei cu a khop lo ti theihtheih zet in a ei thluh lohli. A dang a duh bet ti
theihthei zet in, i run zohih, a nui hnenah cun dil bet ngam hmel a pu lo. A
sung le hmuh hlan ah ka rawl cu ka vun pe ih, cu khal cu a ei thluh rang nasa.
Rawl a ei thluh veten fiang rero ttul lo in, rawl suan a tuah, cun vawk rawl pe
ding in a suak sal. Zohman in va bawm tum hmel khal an um lo. A hna tuan cu
thei lo vek in an rak um men thei cun ka mit a ti kham zet. Ka thinheng ka tuar
awk lo phang in ka suahsan hai. Tlun lan ka tum laiah an innhen te inn luh
caknak ka thinlungah a ra um. Ziang si maw theih duh ah an inn ka va lut cu
putar le pitar kum upa nawn ding hi an rak um''.
Ka
kut ih Nazi ka vun zoh cu nazi 5 a rak kim zikte. Siar nuam ka rak ti tuk
ruangah rawl suan ka rak hngilh ziknte hi a rak si. Siar peh cak zet in rawl cu
zamrang zet in ka vun suang. Mahlawng ih um hrangah cun kan inn hi duh hnakin a
kau deuh in ka thei. 'Ka pa khan in thih san lo sehla, tuah hin a mah thawn
rawl kan ei tlang ding si', tivek tla ka ruat ih,ka rawl ei khal a thaw thei
lo. Khai ca kha ziangruang ih ngan saw a si? Ziang ruangah ka theih ah a rel
dah lo? Thusuhnak tampi ka sut aw,ziang si maw a um zumnak thawn siar peh sal
ka cak zet. Rawl ka ei thluh hnu cun ka itkhun ah ka vun siar peh sal.
"Cui putar cun i
hmuh dah lo ruangah maw,zingpit ah innleng an nei dah lo maw si ding, in hmu cu
mak ti zet in in zoh. An inn ka lennak san tla ka vun sim tikah cun a nupi cu
ko in, Tapthlang ah meihlum ai phah in kan to hai. A thawkah cun an inn kiang
nauhak pate i thu cu an rel tha duh lo. Hmanseh theih ka cak tuknak ah le ka
suh tam tuk ruangah hi tin in sim...
Peh leh ding......................
