2018 FIFA WORLD CUP RUSSIA THLIRSALNAK

By, Biak Lawm Zual

Awle, a vei (21)nak FIFA World Cup cu khop lo cing ten July 15 (2018) ah a cem ruangro ta. Tui tum W.C cu mitmeng ta pauh cun kan zoh ti sehla kan ti sual tam lo ding. Leitlun a cangkangih, inn tin deuh thaw ah TV kan hung ciau ih, zoh pi tu khal nei mumal loin, mai inn sung te ciau in umhar zetih zoh le thlir ciau ah a cang ta a si hi. Kan theih tlan zo mi le kan zoh ciau mi si khal sehla thil um dan tete mal lai in a hnuailam ah zoh tlannak kan nei tlang pei.

Zohman Neh Lo : Group match ah team khat in vei (3) ciau an sit ih, cumi ah Group A isin Eygipt le Group G isin Panama tei’ team hnih cun zohman neh mi nei loin (mark khat hman hmu lo) ningzak mualpho ten an ram lam pan in an tlung muarmo.

Team Khat Te Lawng : Kan Asia continent isin W.C ah team(4) an lut ve ih, cu mi sung ihsin team khat (Japan) te lawng in Group match lan in knockout an sit ban ve ih, Quarter cu an kai ban cuang lo. Leitlun level ahcun, Asia cu a tenau deuh lai a bang.

An Vel Tap : W.C Champion lai Germany team cu Asia team a si mi S.Korea in Goal hnih ih neh in an vel tap ih, ninghang riahsia in puantom an zual ih W.C an mangtha ruangro mai kha cu thilmak a tling.

An Neh Vivo : Uruguay, Croatia le Belgium tei’ team (3) cu Group match ah, an ralpawl an neh vivo ih mark 9 (full mark) ciar hmu in mawi tak in an kai so.

An Hlon Thla Thei : Round of 16 match ah inn tek Russia team in hmin thang Spain team cu Penalty Shotout hmang in an hlon thla thei tariai mai. Inn tek cingcing..

Mithiam Umkhawmnak : Tulai leitlun player hminthang le thiam umkhawmnak  France le Argentina an nuai aw vutvo ih, France in 4-3 in nehnak a co hnu ah, Uruguay le Portugal khal nang maw kei ti aw veve, mah tawk ih rinsan aw ttette an hon buanaw taktak mai cu a netnak ah Uruguay in 2-1 in an hmin an hum ngah ta a si.

A Kai Ban Lo : Group B le Group H ita zohman Quarter final ah an kai ban lo. Group A le Group G ita team (2) veve an kai thung.

An Ning A Hang Tuk : Semi final ah zo deuh saw si ke tiih ruah ciau mi France le Belgium tei’ team hnih cu thih tha suah in an hawn thua aw taktak mai ih, France hmai kham Umtiti ih lu sawhnak kham thei loin, Belgium pawl cu goal khat ten an sungih, ninghang duahdo in final an lut thei loih third Place hngakin an duh tawk ta a si.

 Zum Lo Sawn Mi : Croatia le England cu Semi Final ah thei tawp suah in an cil aw ih, mipi tam sawn in an zum lo sawn mi Croatia team cu 2-1 in an cungcuang deuh ruangah hnangam ten final hngak in an ha an tat thei ta.

A Vei(2)Nak : 2018 FIFA W.C kharnak match netabik ah France le Croatia cu leitlun mipi hmai ah nau ce vek hlah ti lungput nei in, an hual aw ih, France cingcing in 4-2 ih neh in, W.C Shield pi cu uangthuang tak in an cawi ih, a vei (2) nak W.C Champion sinak thuanthu an ngan thei ta a si.

W.C Zohtu Larbik : Tuitum W.C zohtu lakih larbik le langsarbik cu, Croatia President Kolinda Grabar Kita rovic hi a si. Ani hi Croatia nunau President hmaisabik khal a si. A hmel a tha ih, a tuak fawn, amah len a tum si, tongkam thiam takin mipi hip thei zettu a si. Tui tum W.C ah Croatia team an sit tinten a hmunah a va zoh theu ih, a fehnak khalah cozah vanzam hmang loin, Passanger to mipawl to in, a mai paisa cem in, mi zaran menmen vekin a feh theu, uar a um tuk. A netabik laksawng pek tumih Croatia team form (Jersy) hruh, nunau mi rak pom vivo tu kha a si.

Goal thun tambik team      : Croatia – 21,   Belgium – 16,

                                             England – 16,    France – 14,

                                             (Penalty shotout tel in)

Match khat ih thun tambik : England 6 – 1 Panama,

                                             Russia 5 – 0 SaudiArabia

                                          (Caan cem Penalty Shoutout tel lo)

W.C sungih Goal thun zate : vei (193) (Caan cem hnu Penalty Shotout tel in)

W.C sungah match (puai) : Vei (64) a um

Bulpak Laksawng ngahtupawl : Harry Kane (England) Sui bout,

                                                    Luka Modric (Croatia) Sui bawhlung,

                                                   M bappe (France) Young Player Award,

                                                   Caurtois (Belgium) Goul Keeper (Sui kutkawr)

W.C = World Cup tinak a si.

Tui tum W.C cu bulpak ih milar taktak Ozil, Suarez, C.Ronaldo, Messi, Neymer le M Salah pawl cu tuan teah puantom zual in mai ram lam an pan tariai. Ziang khal len dam tei um kan zuam dingih Kum 2022 QATA FIFA W.C hngak in khua kan cuan a si pei cu.

BUAI LO, BUAI

BUAI LO, BUAI

Khampat cu O le AW ah kan buai lo.

U ah kan buai sawn.

 Khampat cu ral ah kan buai lo.

Tiidai ah kan buai sawn.

Khampat cu Ca zoh lamah kan buai lo.

Phone zoh ah kan buai.

 Khampat cu fim zirnak lamah kan buai lo.

 Fangphun, fangat zirh awknak lamah kan buai sawn.

LAMZIIN

LAMZIIN

By, Bawite Laisak

v  A caan um lai ah cun Man a neihzia kan palh ṭheu, Caan a liam hnu ah cun Sirawknak in kan khat sawn riangri.

v  Na Duhdawtmi kha ni nikhat khat ah An ziam ral leh ding. Tui' ni ah Duhdawtnak thu sim aw.(nikhat veikhat)

v  Nangmah le nangmah rinsannak lawngin Na nunnak na tlamtling ter thei.

v  Ngakṭah leh Nuhmei khal in Milian zet vekin an hna a ngam thotho. Minung cun kan ṭulmi si loin Kan duhmi le a um lomi kan buaipi tam sawn ṭheu.

v  Mi ṭhenkhat cun in nomter theitu(milian/rothil)kan ruahsan ṭheu. A taktak ah cun mit meng cingih kan palhmi tumpi a si sawn.

v  Na duhdawt zetmi Nu/Pa kha Na hrang a tlin famkim lo vekin A hrangah na famkim tawk thluh ve lo.

v  A taktak ah cun Duhdawtnak timi hi A famkim lomi thil pa hnih komkhawm cop vek khi a si.

v  Kumkhua a hmun ringring lo, Nikhat khat ah a ziamral leh dingmi Minung Duhdawtnak.

v  Nunnak timi khal hi Ral do vek Neh ringring a theih lo na'n Ral do ṭhang cun ṭan daan a thiam. “Sung” timi na ṭih sungah cun Nehnak na co dah lo ding.

v  Mi Zapi hmuh daan le zoh daan men in A liampi maitu si tum hlah. Leitlun thil hi a hman daan thiam cun Santlai lo le ṭangkai lo a um lo.

v  Harsatnak cun in thleng danglam thei ih In thleng danglamnak cun Hlawhtlinnak khal in pe thei.

I FEH SAN HLAH

I FEH SAN HLAH

                 By/ Rc tuallawt

Michale le Merry cu party nak inn varanda ah an pahnih lawg in an to, himi zanah hin an rualpi pakhat in party a tuah. A fehtu lakah ngaihzawng neilo an si veve ruangah an hlei vekah a cang. A kopkop in an um hai ruangah inn sung cu nuam ti lo in inn leng Varanda ah Van arsi tleu sepso tla cuan in an tonak san a si. Hmanseh an bia aw lo. An nel aw lo. Thei aw dah tuk khal an si lo. Nehhnu deuh cun Merry cu a ra țawg suak "tulai cu thil ziangkim hi ka khpo, ka ning. A sullam khal ka thei lo. Tlangval ngaihzawng neih ding tla hi um ve mei sehla aw" a run ti. Michel cun zoh khal zoh lo in, Arsi cu cuan phah in hitin dim nawn in a run tawng "tuizan khal a hleifuan cu kan si mei lo sawm, ngaihzawng nei lo umsun kan si hmel ko" a run ti ve. Merry cun a thokpekah cun Michael cu a nel lo nasa. A tawng mal hmel si, cu ti a ra tawng suah hnu cun Merry khal a khuaruah a nuam deuh. Merry cun "ti daan ding tha zet ka thei, game lek sehla ninum tuk khal a zia deuh men thei si" a ti. Michael cun "ziangvek game maw?"a run ti sal. "Mak lo lamte, ni 100 sung kan ngai aw dingih, tlawng pih caan ti ding um lo thawn". "Poi lo pi. Keikhal tlawng cawlh caan tuan ding cuca ka nei ve lem lo". Cui zan ihsin cun an theih lo in duhdawtnak hram an rak thok hi a rak si. Cutin hlim zet in cui zan cu an hmang.

Ni 1 nak :-
Michael cun a Bike a la suakih tii kua ah feh in, nga sio tla an thlak. Tiiva kap thingpi thuai daihnemah an to tlangih an kuah aw aw. Cu cu an kuah awk hmaisa bik a si. Zan lam an tlung phah ah nauhak pate ih zuar mi Ice-cream an leiih, Merry cun Michael ih hmaiah Ice-cream a hnih sak buaibi. Michael in hnih ve tum in an dawi aw aw. Cutin hlim zet in an lek tlang.

Ni 8 nak:-
Michael cun an khua kiang Tlangparah a hruai ih, cutawk ah Ni tla ding an cuan tlang. Ni a tlak zik cun Ni in Merry ih hmai cu a run sun tleuih, ni dang hnak ai in, Merry ih hmel cu Mawi cuang in a thei. Ni a tla ih khua a run thim. Thlapa a hung suak salih, tlangpar hramno parah dai aw in an to tlang. Arsi pawl zo siar tamtam an zuam aw. Arsi zam lai an vun hmuh cun Michael in wish (duhmi, thinlungih hiarmi) tuah a vun fial. Cu tikah Merry cun ziang si maw hi phun sepso in a vun dil. Cun Merry ih luu cu Michael ih liang parah a vun ret.

Ni 80 nak
Park ah an feh tlangih, camera tla keng in Mak zetzet in an zuk aw ciamco. Cutawk ih a ra ve mi nauhak pawl thawn an lekih, Michael in phuai (lamtang) a neiih, Merry khal in phuai (lamtang) a nei ve. An vun lekih Merry le phuai (lamtang) in an neh sapbei.

Ni 84 nak
Merry cun an hmuan i feh a sawmih, an pahnih lawng in hmuanah an feh. Ni a tla zik thlang, van taw a sen, lingmo (orange) kung thuaiah an kiss aw aw. Cucu an kiss awk hmaisa bik a si. Nuam zet in caan an hmang.

Ni 99
Cui ni cu nuam sinih hmang ding in khua lak ah Kee thawn an vak. Zinkap tonak tuahmi parah an to tlang.

1:23 pm
Michael cun "hitawkah rak tonsung aw, in ding ka va lei duak ding" tiin dawr lamah a feh.

1:43pm
Merry cu amah lawng in minutes 20 lai a to zo, Michael le a ra kir thei hrih lo. A thin a Nuam lo zet thlang. Cu laifangah putar pakhat a ra ih, aw nem zet in "Merry na si maw" a run ti. Merry cun "aw si e, ziangthu si" a ti tikah cu pa cun "mitu te ah zuu ri pakhatih mong mi motor in mi pakhat a su ngah pangih, a rualpi na rak si pang maw tiah ka lo sut"a run ti. Merry cu zamrang zet in Michael ih umnak lam pan in a va tlan. A va thleng cu Michael cu lamzin parah thihnai thawn a rak it. Merry hrang in dingih a leimi Apple Juice cu a kut ah a keng fekfek lai. Zamrang zet in Siizung an feh pi.

11:00pm
Doctor cun Michael cu a dam duah a zum tuk nawn lo. Michael ih bawngbi zal sungih ta a lak mi cahnah cu Merry a pe. Merry cun cui cahnahte cu a vun siar. "Merry hi ni 100 sungah hin duhdawtnak i sullam i theih ter. Hlim zet in i tuahih, ni 100 lawng hrang ah cun ka khop lo. Kumkhua hrangah ka duh a si. Merry ka lo duhdawt" tiin.

Merry cu mitthli fawr cing in Michael hnenah a va. "michael hi thlil hi a cem hrih lo pi. Ni 100 a kim hrih lo. I feh san hlah, a ngah lo. Keikhal in ka lo duhdawt. Cun maw, Arsi a zam laiih "wish" i tuah ter kha, ziangsi ka dil na thei maw? ka tlangval ngaingai si ding in ka lo dil sokhaw, tho hnik"

12:00am
Merry cun Michael ih lungtur depdo cu a ngai ringring. A ruahsannak a hlo vivo. An tiam awkmi Ni100 cu a cem ta. Michael ih lungtur khal a cem riairo ve.