PEK SUAH NUN ( Vol -1)

( Cangthlan : Act 20:35b )

By, Cung Sin Mang (Royal Mangte)

“Ngah lam hnakin pek lamah lungawinak a tam sawn,’ a timi ṭongkam kha ciing ringring uh,” ( Tirh 20:35b ).

Mi zokhal in pek lam hnakin ngah lam cu kan duh cio. Peknak thu lam hnakin ngah lam thu hi ngai nuam kan ti. Leitlun milian maktara Bill Gates, Warren Buffett ti pawl hi an peknak a ra nasa tuk mi pawl khi an rak si.

Emerson in “pakhat khat ngah ding ahcun pakhat khat cu kan pek suak le kan sung ( can ) ngam a \ul a si” tiah a ra ti. John C. Maxwell khal in “peknak hi minung kan nunnak ah a sunglawi bik mi thil le hnaṭuan a si ” tiah a ra ti ve.

Mi tampi kan pek siang lonak a san bik cu kan neih tawk parah kan lungawi thei lo ih kan duhham ruangah a si. Mai co tawk parih a lungawi thei lotu cu pek suak ding ah cun a hrangah thil harsa bik a si. Neih tawk parih lungawi thiamtu cun pek suak ding hi a harsat lo hrimhrim.

John D.Rockefeller cun “sumpai tam tak ka hawl hmu. Sinan ka sumpaipawl in lungawinak in pe thei cuang lo” tiah a ti. Mal te par le co tawk parih a lungawi thei lotu cu tampi a neih khal ah a lungawi thei cuang lo ding.

Thusimtu 5:10b
“Tangka lawnglawng a ruattu cun ziangzat a miat khalle a mal tuk a ti ringring ding.” Hi zawnah tangka lawng siloin duhhamtu cu tiin vun hman ka duh. Duhhamtu hrangah cun ziangkim hi tawk ti a nei dah lo ruangah pek suak ding lam cu a thinlung ah a um lo lawlaw ti cu a fiang.

Richard Fostrr in “kan neih mi sum le pai, thil le ri hi mi bomnak le peknak ah hmang uh si. Cutin lungawinak na sar suak vivo dingih duhhamnak thinlung kha na that in na neh suak ringring thei ding a si”  tiah a ti. Ziang biaknak khal in duhham hi a kham mi a si. Asinan mi duhham lo kan um lo. Duhhamnak neh suak thei dingah cun pek suak hi a thupi tuk mi a si.

Rabindranath Tagore ih ngan mi pakhat cu ...... “pek nak ih a tel lo mi sum le pai, thil le ri pawl hmuahhmuah cu zianghman san tlai lo le sullam nei lo mi an si” tiah a ngan. Minung kan nunnak hi peknak tel lo cun nung cing ih mi thi vek kan si.

Jesuh Khrih ih in duhsak mi khal peknak hi a si. Jesuh leitlun a len lai can khalah peknak in hram a thok ih peknak in a lei taksa nun a cem ter ve a si. Kan nunnak hi vun ruat cio hman uh, Pathian ih in pek mi lawngte an si.

Thlawsuahnak le lungawinak ti pawl hi hmun hla pi ah an um lo. Peknak sungah an phum aw \heh a si. A pe suaktupawl nun ahcun pek ding thlasam loin Bawipa in thlawsuah a pe. Pek ding a nei dah lo tu pawl nun ahcun an neih sun hman kha lak sak an si \heu.

Ka nei mal tuk lai, tam deuh ka neih in ka pe leh ding tiah mi tampi cu kan ti ṭheu. Mal te na neih lai hman ih na pek siang lo ahcun tampi na neih sinsin ahcun na pe siang lo sinsin ding tinak a si. Ka nei mal tuk lai timi cu sian lo \ongkam a si an ti.

Bible sungah peknak thu hi tampi a ngan. Nuhmei ei ding nei lo khal in an pe ih, thlawsuah a let in an ngah thu pawl khal kan hmu thei.

|hanso na duh maw, pek suak aw.
Thlawsuah don na duh maw, pek suak aw.
Lungawi nun neih na duh maw, pek suak aw.

Jesuh Khrih ih in duh sak mi khal peknak nun hi a si.

2018 KCP FOOTBALL CUP SPONSORS-TU TAM

Tuikum 2018 KCP Football Cup cu hminsin tlak zet mi thuanthu thar ngan in, tui' hlanih kan rak theih/ton dah lemlo mi ramsung/ramleng ihsin sponsor tampi a lut. 

Sponsor-tu an hmin le an sponsor mipawl cu a hnuai lam vekin a si:

1) Salai Tha Tin Ceu -Trophy
2) Salai Isaak Lal Biak Zul – Net(Goal ban dunglam zar mi Paih)
3) Salai Dr.Van Rum - Bel khap (10) le Ks.50000
4) Salai Hawl Thang - Ks.30000
5) Salai Mang Bawi (Malaysia) - Ks.50000
6) Salai Vante (Malaysia) -Ks.50000
7) Mai Za Biak Mawi (China) -Ks.100000

Puai thawh tlai ahhin Sponsor a um bet vivo ih, Sponsor-tu le an sponsor zat-pawl cu a hnuailam vekin a si.

1. Pa Thara ks.5000( lekthiambik hrang)
2. Pa Biak Nawl (Lek thiam hleice-pawl) - Ks.22000
3. Pa Pak Hre - Ks.10000
4. Pa Dun - ks.5000
5. Salai Lal Rin Pui (China) - ks.5000

"Pathian zarah kan KCP khal kum hra sung ke a kar ve rero zo ih, tui kum vekih Sponsor-tu kan neih hi a um dah lo. Pathian thlawsuah kan dawng nasa, miphun duhdawt dan kan thiam vivo, a lungawi um tuk rori. Hitivek ten ke kan kar tlang vivo thei asiahcun kan KCP cu tum suk lam siloin thanso lam kan pan deuhdeuh rori ding. Ziangtin kim tawlrel a nuam ih hruaitu siseh, mipi zozo khal kan phur in kan tha a tlung tuk lawmmam", tiin Game Vice-President Salai Țha Tin Ceu cun KCP TLANGAU fehtlang in a sim.

UFC DAAN LE DUN

By/ RC Tuallawt

UFC hi zoh nuam ka ti zetih, kan KCP sung khalah hin uar kan tam ka zum. Hi lehnak hi tihnung le harsa zet, mi raltha le thiamnak nei pawl lawng luhnak a si ti cu kan thei cio ding ka zum. Hi lehnak hi vun zoh men ah cun duhduh i tthua aw hluahhlo an bang zet. Hmanseh taksa ttihnungnak lai pawl cu an rak kil aw ve nasa hi a rak si. Curuangah an daan le dun hi ka run ngan hnik ding. 

Glove(kut tuam) hi kut zungcang lang thei, kutcang inchi khat sah ih tuam mi, gram 110 in 170 i rit a si.

 Tap out: Fighter in a tumpi cang thei lo ko a rek tikah ka sung ti lang ternak ah zial lole a sualtu pa'n taksa a beng.

 Knockout: Cang thei nawn lo ko sit lole thawng thluk.

Technical Knockout:- Hliam tuar ruangah sualawknak a cem in. Himi hi then 3 in an then. Referee in sung dingih a hmuh cun pakhat sawn nehnak a pe. Doctor in thisen suak tam tuk simaw, mit khua hmu fiang nawn lo si maw tivekah fight an ti tawp. An nipiah pawl in kan sung ti in hrukpuan an deng lut thei lo nan, an bulpak in sung sawn mei ding in an sim thei.

Sian lo mi

1. Luu i sawh (sut)

2. Mit sung lole mitmu purh sak simaw tham sak simaw

3. Keu awk

4. Sam i dirh sak

5. Kaa sung tham sak

6. Sualpi mi hliam hma lole pem kutzung i sawh (purh)sak.

7. Ruh pehawknak ti nat sak awk.

8. Kiu zum hmang in suk zawng i sawh.

9. Dang i in tham( rek) sak lam hrimhrim.

10. Til i kaih simaw, sit simaw

11. Sualpi mi tlu zo hnu an luu i sit.

12. Sualpi mi tlu zo hnu khup i rawt.

13. Sualpi mi tlu zo hnu ke i ttum.

14. Kaileng zawt kedil i sit

15. Sualpi mi zial i an it lai an luu simaw, hngawg simaw ttum.

16. Sualpi mi Bawngbi simaw, kutbun simaw kaih sak.

17. Sualpi mi cil phui

18. Thinheng ruang i sualpi mi tinat. (Diremnak i hman)

19. Ring lole kulhnak simaw kut i kaih

20. Ring lole kulh sungah huatawknak ttawngkam hman. (Boxing le lehnak dang ah cun ttawngkam sia in an ter aw theu nan, Ufc ah cun a ngah ve lo.)

21. Cawlh caan i va tthuat

22. Referee kut sungih an um lai va beih.

23. Dar awn hnuih va tthuat.

24. Sualpi mi thaten sual duh lo le, sual duh lo ruangih Haa hmai tuamnak ti tla leuhleuh. Naa tuk si lo, naa tuk vekih lang ter.

25. Lenglam mi ra hrawlh awk.

26. Sualawk laiih hrukpuan den luh.

FANG ER (LAI KUM THAR)

By, Biak Lawm Zual

Kan pu/pa san isin an hman \heu mi le an sunsak zet mi FANGER (Lai Kum Thar) cu, tuisun ni tiang nonawn tesin fa tiang hman peh vivo lai a si. Khuahlan laiih an hman dan le tuisan minungpawl in kan hman dan lawngte cu a tikcu le a hmun a bangawk lo vekin, a danglam mi tampi a um ko ding. Tingbul lungbul an rak biak lai san le a nung mi Pathian biak san ti zawng khal in thleng (\hin)\ul mi le tuah rem lo mi tampi a um. Cuvekin KCP khal in FANG ER (LAI KUM THAR) rem le \ha a ti vekin hmang ve ding kan si ruangah, a thuhla tlangpi tal kan theih tlan ding ruat in kan zoh tlang pei. 

A Sullam : Kan lai dan ah bulpak ( mi lian) in an neih dan izir in conlam le nomawknak an rak nei \heu ih, Fang Er hi cu bulpak ta siloin, khawpawh le miphun huap ih neih mi con lam (puai) pakhat a si. Fanger hi kum siar thoknak ah an rak hmang \heu ih, sungkhat unau thi zopawl mang (thei) ringring nawn loin an hngilhnak dingah le kum hlun sungih nat sia \ha lo hmuahhmuah hlawnhlo \heh dingih an hman mi a si.

A Tikcu Caan: Fanger hman tikcu caan hi thuanthu zingzoitupawl an ruah dan a bangaw ciau lo. Hrekkhat cun mirang thla August tiih ruat an um bangin, mirang thla October a si sawn titu khal an um thotho. An hmannak san bik kan zoh tikah August thla hnak cun October thla hi a dik deuh ding. Lai fang an thar \heh ih, rawl lu an khum \heh (thluh) ih, tu cun kum kan vawi ngah zo, kum thar a si zo tiin FANG ER hi an hmangih, kum cang rel (kum siar) nak ah an rak hmang theu. Culawng siloin Fanger an rak hman ah hin Anthur an par zo ih August thla ahcun Anthur an par hrih lo ruangah, tu lai sanih mi tam sawn in, kan hman mi October thla thul (bial) hrawng hi a sual lo bik ding tiah cangantu cun a ruah mi a si. Kan lai nithla siar dan vek cun, tu hi kum hlun zim pepelek ah kan  um a si ti hi thei tlang ciau sehla.

A Hman Dan: Ni hmaisabik ah Vok thau an that ih, an khaw pawh te in hmunkhat ah tlai le puar takin an ei khawm. Cui sin inn tin ah sangzawl an tuah ciar ih , killi nei a pheng le a pum sawl tiin phun hnih in an tuah. Cui a pum sawl te cu “zawl rit” tiah an ko. Zawlrit cu nauhakpawl in hridai in an khit ih an pai piakpi \heu. Zan ah tlangval hmuah in “Leng zu” an pu ih, fala inn ah zan meng in an um khawm. Sunvu ten nomawknak a phunphun tuah in, nauhakpawl nomawknak ah tiin zawlrit an thlai piakpi ih nauhakpawl an zon tir ciamco.

A Thaisun Ah : Nuhmeipawl le sungkhat mithi nei zo pawl in thi an siah \heu. Mithi thlarau hawng suah ni an ti ih, mithi ngai in mitthli canghnap thawn, mithi ngainak hla an sak ih an \ap rero. Khua a hawng zan ih thing\ek thum nei (cawihcaw leng) zaute zik (zim) ah an phun ih, a parah hlam phei an ret. Khua a thim in, far an vang ih, inn sung inn leng tiang in an hul/nawk vivo. Hla in “tlangrai e, rirai e suak law kum thar ah na um thei nawn lo” tiin, khuangdar an tum ih, meithal an kap. A thaisun ah fala le tlangval pawl cu zan an mennak hmun ah rawl an ei khawm ih, thu le hla in sunvu/zanvar an nuam aw.

Al |hing Sun : Ni netabik ah cun fala inn ah tlangvalpawl zu an in khawm ih, nuhmei inn ah nupi nu le pacangpawl an um khawm. Cui ni cu “Al |hing Sun” tiah an ko.

Tlangkawmnak : Khua hlan kan pi/pu pawl nun le an um dan a tawinak ih kan zoh asiahcun, pumcawmnak bang zetih \uan le awl caan nei lo an rak si ruangah, conlam ni hi an urhsun in, an sunsak nasa ti a lang. Nomnak an tuah tintei’ thupi bik ih an ret mi cu “Zu le Sa” hi kan ti khal le a sual tam lo ding. Cu ti khawp in zu le sa an in ei nan an buai, an to aw ti le zu ruangah an siatsuahaw ti hi hmuh ding a um mumal lo a si. Hi zawn te ah an nun cawn a tlak nasa a si. Tui hlan ih zu le sa ai ah, tui san ah cun cini cawhnawi hman hi a \habik mi a si.