By, Vannun Thang Pu
19. Ngaihaw Dialdo
Minung kan zate hin kan nun in hruaitu thinlung hi phunhnih in a feh tlangpi ih, a pakhat cu thuphan per thei lo thinlung le a pakhat sawn cu kanmah rori khal in a dik lo ti kan theih fiang mi kha, midang hnen i dikveki langh tir duh iruangih, mai nun lo pi bumawk rero nun (thinlung) kan nei.
Tah\himnak ah : kan thinlung khalih kan ruah(man) tuk lemlo mi, khawtluang ihsi mikhual an rat tikah, kan tonawk veten, na dam maw? ka lo ngai tuk kan ti aw i, a \ha zet nan, thuphan hlawmtop kan rel(sim) tinak a si. A umzia (sullam) cu mi in fel in ti seh tinak tluk asiih, nun ngai ih fel cuang silo fel vekih lan hnak cun, a si dan vek tei nun hi a \habik ding. Ka sim duh mi bik cu a lenglam ih kan \ong mi le kan lang dan vekin kan sunglam nun kha si thei sehla ti hi a si. Kanni Falam miphun hi kan vansia kan ti ding maw, kan daihzai kan ti ding saw, tlangkhat hnu tlangkhat, khawkhat hnu khawkhat, kan \ong hman mi le kan phunhnam tete hi a bangawlo(dang) deuh vivo hi a si. Laitlang mai suahsemnak khua ciau isin Kawl(khampat) ah kan rawng vai ih, mai suahsem pi unau, mai khawpipawl thawn thei patawp ih, ngaihsakawk le \anpiawk ding cu minung in kan ti ding hrimhrim a si ko. Amah lawng(bel)te cu khawikhua, ziang phunhnam mi ka si ti hi hmunkhat teih pawlkomawknak (K.C.P) sung ahhin kei cu Zahau lalfa ka si, kei cu Sim hrin, kei cu Phautluan hrin, kei cu HlawnCeu hrin kan si ti vekin, a lenglam hmuh theih khalah sunglam thinlung diktak khalah, thleidan awknak lungput kan nei ding asilo. Tuisun ni tiangah ka thlir rero ih, K.C.P kan din thok in kum 10 kan luan ve thlangih, hrekkhat thinlung cu a fiak(\halo) in, duhum lo taktak tla hi ka hmu. Kan sim zo bangin mai khawpi, laihri tlai le mai phunhnam te thiltinak ah hmuah thaw(nuam) emem, phur tak, duh nung tak sisi, miphun pawlkompi (KCP) ah hmuah lang \ha duh lo, thleidannak lungput nei tlat hi kan um hnuaihni in ka hmu. Hrekkhat vethung asilen mai phunhnam cu phun u veki ruat in midang nautat, milak ih lang (suak) lo khal tampi kan um, mai phunhnam te lawng tiawk hlehle nak lungput kha um hram hlah seh. Thungai te ti ahcun minung hi maw \ihzah upat ciamco ding an um cuang loih, nautat ding khal an um cuang lo. Nui’ thla10 pai mi ciau kan si kha. Mai phunhnam silo mi in riahsiat lungawi a ton tik caan ih, kan ngaihsak lo asiahcun, cui thinlung cu K.C.P lungput a si lo hle tinak a si ding.
A thupibik mi cu ziangvek phunhnam u ka si ah, phunhnam tenau ka si ah, ziang khawmi kan si tivek kha K.C.P sungah keng lut loin, ngaihaw dialdo, duhdaw aw derhdo, pumkhatnak lungput, theithiamaw hlehle, zawn ruahawknak nun le thleidanawknak um lo tei’ ke kan kar asiahcun, kan \hangso dingih, kan tumtah mi kan hlawhtling vivo thei ding.
20. A Awm Le Mawitawk
Minung kan thinlung le ruahnak in thleng danglam thei zettu pakhat cu, sinfen(hnipuan) kan ken(hruk) dan hi a si, ti hi eltheih lo mi thu dik pakhat cu a si ve. Hnatuannak hnipuan thawi kan um ah hi cun, milak va suah le puai tiveki feh khal hi nuam kan ti dah lo. Cubangin midang ih in hmuhnak khalah hnipuan mawi(awmang tawk) le \ha thawi’ kan um tikah in hmuh dan a sangih, kan sinak hnaki sangah in ruat(ret) mai hi a rak si. ziangruangah saw khawpi sungih, milian fanu le fapa pawl khi mawi emem le no cemcem ih kan hmuh \heu kan ti ahcun, an hnipuan hruk (ken) mi le an taksa thianfainak ruangah a si kan ti lo thei lo. Mi tampi in khabang lenglam thilih cei(\am) mawiawknak men a thupi lo, sunglam(thinlung) nun silawm pawimawh sawn kan ti \heu ih, a rak diklo nasa. Thungaite kan tiah cun, mi pakhat a taksa a harhdam lo laiah a ruahnak khal a hli par thei lo ih, hnipuan \ha thawn a cei aw paih lo \heu a si. hnipuan \ha le ceiawk hi thupi lo sehla, leitlun huap ih mi langsar(hminthang) pawl le ramhruaitupawl hin hnipuan \ha an ken ka zum lo. Lenglam ih a lang mi hnupuan \ha le ceiawk a thupi lo titu khal in, biakinn ah Pastor in hnipuan se tak (bal emem) thawn thusim sehla, a thusim mi a ngainep bakah, a nautat viau ding ka zum. Hnipuan \ha ken titikah mankhung le design thar ken tinak a si cuanglo. Kan K.C.P sungah hin Pathian \hang\hat khawmnak, lungphun, mopuai, lungawi thusimnak le thu dangdang hmangin caan hleice kan hmang (nei) rero zo ih, tui hnu khal ah a um vivo lai ding. Hi tivek caan (programe) ahhin a si hnipuan ken dan kan uluk a \ul emem nak cu; a hleice takin \uanvo (hmailam ah) neitupawl tla hi cu hnipuan kan ken dan kan ralrin a \ul viau ding. Kan hmuhton zo mi thil ih, mitkham emem mai cu, mopuai le thil dangah laksawng petu rori, inn lak tlannak le hna\uannak hnipuan si awm tak thawi’laksawng (present) kan v ape \heu hi cu, a hmu tui’ hrangah ngainep um le zahthlak tak a si. A cang thei asiahcun, khawm caan le bulpak caan hleice ah hi cun, mi pa in kawr (angki) hngawng (color) nei tengteng hi hru(keng) sehla, a mawi in, a zahum deuh ding. Kan sunglam nun cu ret \hat, lenglam ih a lang thei mi sinfen(hnipuan) kan hruk (ken) dan hi mi hmuh ih a awm le mawi tawk ruat sehla mi upat le \ihzah kan hlawh deuh tengteng ding, a pawimawh tuk.
21. Zawnruahnak Thinlung
Zovek minung kan si hmanah mai’ hrang hlawknak, \hansonak le \anlaknak nei lo cu mi bang lo le mi can lo an si tlangpi ding. Amahlawng te cu thinlung thiangte (midang ti naa riai lo) thawi \hahnem ngaitak ih hna\uan le cangvaihnak cu, zohman in an dem lo lawng siloin, mawhthluk an tong dah lo ih, porh le fak an hlawh riangri \heu. Mi tampi cu mai hlawknak le ham\hatnak a si phawt cun, khua hmu nawn lo le mawi le mawi lo khal ruat nawn lo in, hrawkhrol zetih thil ti mai hi kan hmang \heu. Thungai te ti ah cun minung nun hi cu thinlung hmunkhat tei nun tlang dialdo nak asiih, \ong\himnak hman ah “unau thei pum seu” an rak ti kha. Kan theih ding mi thil pakhat cu minung hi kanmah te lawng nung thei le khua sa thei kan si lo ti hi a si. Milian kan timi pawl khal hi mi nunhar le rethei an um ruangih lian le um thei an si ti hi el theih rual a si lo ding. Kan hmailam ah ziang kan tong ding ti hi zohman in kan thei cia loih, tui sun ni ih zianghman ih ka rel(siar) lo mi khal, ni khat nini ahcun in bawmtu \habik le ka \ul hai (poi) zet miah an cang thei. Cuvekih nung men minung kan si ruangah, midang parih kan nun dan ding le kan tuah ding mi i \ha a hnuai lamah kan zoh hnik pei.
Milian deuh, sumpai nei tam le thil zuar(dawr tuah) pawl hi, khatlam zawngih kan sim asiahcun, mi siahhlawh, midang hnen ih sum hawl rero thotho an si. Cu mi ih pawimawh zet pakhat cu, thil leitu mi mawlmang deuh, zianghman thei lo an si cun, thil man kel siloin, tam deuh ngen tahrat ih lei tir tla hi hmuh ding a um hnuaihni. Cuveki thilti cu a dik lo lawng siloin, midang kan bum tinak a si. Mai minung pi rori bum cu thil dik a si lo hlei ah, zawnruahnak thinlung neih lo thu a si ko. Veikhat cu pitar caklo zet thlang pakhat hin dawrah thil a lei lai ka hmu ih, a thil lei mi kha a zumhnak in a man a rak tam deuh ruangah a paisa ken mi in a daih lo deuhi, in pe uhla a taang lai mi cu inn ka va thlen in ka lo pe ding a tiih, a dil rero nan, bak tir an siang lo thotho hi cu, ka thinlung ten zawnruahnak an va nei lo ve ti lawng siloin, huat-um ka ti. Cuvek thotho in, nunhar deuh midang hnenih sumhlawh \heutu khal hi, a tamsawn cu kan luat cuang lo. Ni ca ih sum va hlawh tikah thazang khal suah duh lo, ni ka tlak tak ah ti rori in, inntek hrang \hahnem ngaipinak lungput nei riai loih, \uan fangfang khal hmuh ding an um lala fawn. Mi hrekkhat ansilen hna pakhat a putpiat( ) in lungkim ten kan la ih, hlawk lo kan phan ruangah, \uan mi hnuhma mawi lo zelzel in kan um lala thotho. Cu mi umzia cu paisa ka ngah tak ah a tawk ti lungput thotho asiih, cuvek cu zawnruahnak lungput kan ti thei pei maw? ziangvek hna kan \uan ih, ziangvek thil kan ti asikhalen, mai’ hna, mi hna tiih thleidannak lungput nei loin kanmah le kan tlin tawk ten zawnruahnak thinlung thawn kan nung asiahcun, kan hmakhua a ong dingih, mi fak kan hlawh ding.
