KCP TLANGAU.APK

THEIHTERNAK & SAWMNAK

Pathian thu, sermon, theihkauhnak, thufim le hnihsuak tvk le thu dangdang ca tha taktak siar na duh asile Khampat Chin Pawlpi (KCP Central) ih thla khat voikhat, Nov-Dec 2017 ihsi ca a suah theu mi KCP TLANGAU hi online ah siar theih in a um zo.

KCP TLANGAU ca hi thlahnihah voikhat suah theu mi asiih inn tin ah pakhat ks.200 ih zuar mi a si. A tu ah, Ram dangdang, leitlun hmunkip ih a um mi KCP member-pawl khal in an rak siar thei ve nak ding hrangah online ah ca thlah a si ih himi khampatchinpawlpi.blogspot.com  ah rak leng ve theu ding in kan lo sawm.

Cun KCP TLANGAU.apk (Only for Android) khal tuah cih asiih, na phone ah download na duh asile Hinah a ca rori ahhin hmet aw!

KCP Tlangau facebook page khalah thu țhațha shared in a um țheu ih, ca țhațha siar na duh asile a hnuaiih KCP Tlangau page hi LIKE rak pe ve aw!
https://www.facebook.com/khampatchinpawlpi/

K.C.P LE ZATLANG NUN Part (1)

By, Van Nun Thang Pu

Khampat khua ih a um mi Chin ( Laimi) miphun kan zaten, thil ziang tinkimah, lungrual te le pumkhatnak lungput thawn ke kan kar tlannak ding ruatin, in finkhawitu ding le lam in hruaitu miphun cangvaihnak (K.C.P) din in a um. Hi pawlkom pi sungah zopawl an cangvai ding timi thusuhnak cu:- a sungih a um mipawl an si. Zopawl saw a sungih umtu cu:- Chin(laimi) miphun a simi pohpoh cu um ding a si. Ziangruangah kan um ding:- kan umnak ding diktak a si bakah, laimi kan si ruangah a si. Minung kan zaten kan umnak ding hmun le umlonak ding hmun tiin kaa hnih ah a thenaw verver. Tahthimnak ah Nga-pawl hi tidai sungi um ding le nung dingi  sersiam mi an si vekin, ti sungah an um tengteng a tul. Nga si ve si ti sungih um loin, khawlengah a nung thei ih, a um nuam viau asiahcun nga piangsual a si tinak a si ding. Hi pawlkompi sung ahhin, kan duh le duh lo siloin kan suahkehnak phunhnam isin, el theih loin, cangvai ding le umkhawm tlang dingah ret khawm mi kan si. Kan suahsempi hrekkhat cu mai’ sinak le sulphumnak( phunhnam) hman upatnak le sunsaknak thiam loin, miphun dang lakah sal bangin a tang lai mi tampi an um lai. Leitlun thuanthu ih mi ropi le mi fimpawl ih thuhla kan zoh tikah, mai’ suahsemnak phunhnam upattu le tantu an rak si ti kha kan theih ciau mi a si. Zawhte hin uico bangin bo ciamco sehla, a hmutu hmuahhmuah cun , hi zawhte cu a va aa ve, uico bangih a bo ciamco hi kan ti tengteng ding. Zianghman khawruahnak nei lo (rannung) hman amai’ sinak vek siloih a um kha a dik lo kan ti ah cun, mi aa ti a duh lo hmanah mi piangsual pakhat cu a si hrimhrim ding. Kan suahsemnak miphun hi kan duh hril a si loin khawziang lairel a si ruangah zohman in kan ti danglam in kan el thei lo. Kawlpa cu kawlpawl hrangah a cangvaih kha a ti ding awm hrimhrim asiih, laipa cu laimipawl hrangih a cangvaih cun minung ngai cazin ah a lut tinak a si. Kan zaten ziang mi ka siih zopawl hrangah ka cangvai ding, ka um ding timi kha tha tein ruat tlang uhsi.

1.Siat Ni That Ni
Minung kan zaten kan duhah, duh loah simaw kan ton tengteng ding mi thil pahnih a um. Cui thil pahnih cu kan parah thleng hlah seh tiih kan kham(hrial) thei lo mi an si. Kan neihnak, kan fimnak le kan cahnak hmangin thleng hlah seh tiah, tan la mengmang khal sehla, a tikcu caan a thlen cun amahte a ra thleng mei. Cui thil pahnih cu lungawi aipuang taki kan um ni le riahsia mitthli thawi caan kan hman ni hi a si. Cuti asiahcun kan minungpi (a hleice in K.C.P sungah) in riahsiatnak tong an um tikah, ziangvek lungput neiin kan nun(caan) hmang sehla a thabik ding ti hi rel tul loin kan  theithiam thluh mei dingah ka ruat. Miin thlawsuah an donih lungawinak caan an hman tikah, thinlung zaten va lungawipi mai kha kan ti ding diktak cu a si. Lungawi lam cu thil nuam lam le tha lam asiruangah ret tha hrih sehla, riahsiat mitthli tlaknak kan unau in an ton tikah mai’ hnatuan poimawh tak le kan duhnak thil dang tan in, hnemawk le thlakung zawnawk hi zokhal in kan ti ding mi cu a si. Midang zawnruahnak le zangfahnak lungput kan nei lo a si hmanah, kan parah hi thil hi a thleng ve lai ding ti ruatin, a awm le mawi tawk tal cu theihthiam tlang a tul. Tilva le saram men bangin ziangruat loih kan ummen asiahcun, a siraw saltu ding le a tuartu ding cu kanmah hi kan si. Mifim thinlung cu riahsia mitthli tlaknak hmunah a um i, mi aa thinlung cu hlimhlawpnak hmun ah a um.

2. Mi Aa Te A Si Hmanah
Minung hi kan nui’ pumsung isin kan hawng suah tikah kan mai duhhrilnak siloin, mifim deuh le mibanglo (sihmuifun) deuh tiin, sinak bangaw lo tak hin nunkhua kan sa ciau. Asinan mifim in, mi aa deuh kha a hmuhsuam mei ding asiloih, mi aa deuh khal in mifim kha a upat ciamco nak ding san a um cuang lo. Mi zokhal in fim cu kan duh ciau nan kan suahkeh sinak in a zir miau lo cun ti ngaihnak a um fawn lo. Ziangvek dinhmun te kan si hmanah, kan nunih a pawimawhbik mi cu, kei hi midang hrangah tangkai(thathnem)nak ka nei maw ti hi a si. Mi pakhat cu a fim zet tla a si men thei nan, a fimnak le a thiamnak kha miphun(K.C.P) hrangih sawrtlak, hmantlak ih a pekawk lo ah cun, midang hrangah thlawsuah a si dah lo ding. Mi aa(mawlmang)te ih kan ruah mi khal miphun(K.C.P) hrangih a ti thei tawk le a tlin tawkte i  a pek(hman) awk asiahcun nun hlawhtling le upat sunlawih tlak nun neitu a si. Mah cu fim zetih ruataw tahratih miphun hrangih titheitawk suahi hmangaw reropawl hmuhsuam nautatnak lungput thawi zawkzet rerotu pawl hi cu kei cun ka ngaisang lo lawlaw si ko. Mah hmuah hmangaw duh silo, a hmangaw mipawl nautat le soisel rerotu hi cu miphun (K.C.P) hrang thansonak dawnkhamtu an si. Mahlemah kan zohfiang(check)awk a tul nasa ding. Ka hmuh ve dan ah cun “MI AA TE”  a si hmanah, a tlintawk te ih tan la, miphun hrangih cangvaitu le pumpe awtu pohpoh hi cu ka ngaisangin ka upat lawlaw a si. Kanmahte fimzetih kan ruahawknak hnakin, kei hi miphun hrangah mi tangkai, hmangawtu maw ka si i, tlintawk tei tuan le peawtupawl lam phittu le dodaltu ka si ti hi kan theihawk a tul.

3. Nun Can Ziaza
Minung hi kan lungput a bangawk lo vekin kan nuncan ziaza khal hi a bangaw ciau lo. Mai minungpi lakih puarthau(hngalhngawng) zet an um laiah, midang lak khalih langngam lo (zakzum) tangdawr an um lala fawn. Ziangvek ziaza nei kan si hmanah, midang hrangah tuar har(phurrit) ka si maw tihi, kan mah le mah kan zoh hliahawk a tul ringring ding. Leitlun nun a thangso i, cangkan lam a pan vivo vekin, kan nun hlun(kan rak ti theu mi) le ti dan tha lo(mawi lo) pawl kha dungtun in, tansan vivo ding kan si. Tulai san ah tlangval zuri, sualaw rero khal an mal(um lo) vivo thlangih, culaiah kan miphun nuncan vun zoh sehla, a ningzah thlak in a poi tuk lai. Kan falepawl zuri sabah i, aukiau le hnaihnoknak tuah an um ringring lai hi, kan biaknak thaw khal in a remaw lo mi a si. Christian-pawl in kan puai sunglawibik X’mas ah tla hin kan nun hi vun zoh sehla, a tenum in a zahthlak kan ti lo maw? Puai rawlei(ruaitheh) caan ah tla hin zuri cingih hnaihnoknak tuah kan um ringring lai tla hi cu san kan man lo deuh cu a bang. A poi mi pakhat cu mah hnakih kum upa le hruaitupawl tihzah upat (hmaisong)nak khal nei riai loin, kan duhduh in khua kan sa i, kan tal pawl men tla hi a bang ka ti theu. Khat lam ve thungah cun nulepa khal hin mawhnak tampi kan nei ko ding. Kan fapapawl hnahnok zetih an um caanah, miphun (K.C.P) in nunsimnak le cawhkuannak tuah zik sehla, nulepa in kan siang loih, kan hraphria lala fawn, tuah thatawk a va har ve. Kan khawtlangah mi nautat kan silonak dingah, kan nuncan ziaza kil tha awin, tanrual dan thiam tlang uhsi.

MIRANG ȚAWNG SIPIKING A ZIR THEIH

By; RC Tuallawt
Hi Leitlun hi a va mak lawmmam ve cu ka ti lo. Hmanseh a sungih um milai pawl hi cu kan maksak zet ka ti. Fala cu sim loh,mi nupi duh zet mi,culawng silo nauhak kumkim lo tiangtiang ih pawngsual duh kan um hi cu..Culawng si hrih lo,a rapthlak bik le mak ka ti emem mi cu, mai' NU rori vun pawngsual hi cu rapthlak ka ti.
Laimi kan si ih,Lairam hi kan ta asi. Hi lo ramdang kan nei lo.Cuvek tthiamtthiam in Lai țawng hi kan țawng a si ih,hi lo țawng dang kan nei lo. Laimi hrangah cun Lairam le Lai țawng hi kan NU a si.

A tlunih ka thuluu khi na rak siar maw?. Mirang tong Sipiking ka ti khi ka ngan sual a si khi.. I hnihsan maw? I nautat maw? Mitampi cu nan hnih tla a rak suak men thei. "Khivek mirang ca meimei ngan sual thei teh'' tiin. Culam cu rel vivo ka tum mi a si lo.
Mai ca(lai ca)hmuah ngan sual phang riai lo,mirang ca hmuah ngan sual phang hliahlia nak thinlung lam sawn si ka rel tum. Hihi miphun ziamralnak ziaza a si thei kem?
Laițawng theih bet le theih kauh tum silo in,mirang ca hmuah theih kauh tumnak thinlung hi..Na thinlung le na nundaan in a zir lo cun Lai miphun hi hloral lo hmansehla nagmah kha na hlo mei lo ding sawm?

Curuangah kan thiam tawkte in Laițawng/Ca hi kilhim,uar in le dik zetin hman tum sinsin uh si. Famkim kan umlo,hmanseh duhnak le tumnak neih cu hlawhtlingnak a si.
A hleice in tuilai online khawvel ah Mai țawng hman cafang kim ko ngan/type paihlo,mirang ca hmuah hman sual le ngan sual phang emem na si maw? Status tlang hnihkhat ngan ding khal ih,cafang kimko update paih lo tiangtiang in mi zangzel na si maw? Laica hi cafang kim ten ngan le hman hi na ttuanvo le na ti ding a si tihi na kaih ngahlo a si cun laimi na rak si lo tla a rak si sawn men thei. Silo hmanah miphun ah na fiang lo zet tla a si sawn thei. Cafang kim a t'ul kherkher cuang sawm na ti maw?Kan laimi Mifim,mithiam pawl ih wall ah lutin an status vun zoh hnik,cafang ler le shortcut na hmu lo ding. Ziangsi a sullam ti cu ruat ve mei aw.

Cafang kim lole duhduh ih Laica na ngan hi Kan NU na pawngsual ti rak thei awla,kimten ngan tum vivo aw.
A ho tuk,a mak lo tuk na ti maw? Asile ni 3 sung cafang kimten vun ngan tum hnik e. Na lawtnak in a tlin maw? Tuah cun mi tampi in Laițawng/Ca hi an pawngsual rero . Maițawng/Ca kilhim,zir bet duhnak nei vivo uh si.

LEITLUN THUFIM LAWR KHAWM

By, Salai Run Uk Mang (PaVal)

1.A lo huatupawl na neh thei dan cu na rak huatvelonak in a si. (Richard Nixon)

2.A sannakbik ih thlen na duh cun a niambik in thok aw! (Publilius Syrus)

3.A tlunlamih na feh thei lo asile a tanglam ihsin na feh a tul. ( Jewish Thufim)

4.Amai ram le miphun hman a duhdawt theilotu cun zianghman a duhdawt thei lo ding. (Biron)

5.Awkam nem in thinlung hak a neh. (Mirang Thufim)

6.Bel kawlawng cun thawmvang a nei cuang. ( Mirang Thufim)

7.Caan hi thinsiapawl hrangah sii thazet a si.

8.Caan hmang thiamtu hrang ah cun caan lawng neih a theih lo. ( Mirang Thufim)

9.Cabu hi thisen nei lo na ih tong thei a si. ( RL Stevenson)

10.Cabu pakhat lawng siartupawl tih an nung. (Latin Thufim)

11.Cafung hi hriamhrei hnakin a tha sawn. (French Thufim)

12.Calai neitu miphun sinak lawngah duhtawk loin calai cakzet neitu miphun kan si a thupi. (Pu Nozaam)

13.Daan a tam le dingfelnak a mal deuhdeuh. (German thufim)

14.Daihnak hi thildang hnak in a thupi mi a si. (GreekThufim)

15.Duh tuk nak in rei a daih lo. (India Thufim)

16.Duhdawtnak in leitlun a mawi ter. (Latin Thufim)

17.Elawknak in thuhla pahnih kha pakhatah a canter ding a si. (Spanish Thufim)

18.Fa sual neih na duh le an duhnak thlun vivo aw. (Chin Thufim)

19.Fim tuk cu at a si. ( German Thufim)

20.Harsatnak in ziangbang tuk minung kan si ti a lang ter. (Epictetus)

21.Hlawhtlinnak hi thinsaunak ih rah a si caan a um. (Mirang Thufim)

22.Hlawhtlinnak ropi tak ngah ding cun harsatnak na men lo pahtlang ngam a tul. (Chinese Thufim)

23.Hmuihmel thleng theih lo nuncan thin theih. ( Chin Thufim)

24. Hngalnak ih dungah tlaksiatnak in a thlun. ( Mirang Thufim)

25.Lamzin diklo ih feh hnakin vei hnih suh sal a thasawn. (German Thufim)

26. Lei hi zung thum lawng a sau nan pi ruk sang minung a that thei. (Japan Thufim)

27.Lungmankhung bangin hmuh ding harsa tuk hlah aw! Lungto bangin hmunkipih hmuh ding khalin um hlah aw! ( Chinese Thufim)

28.Mai umnak thei loih leng suah cu hlohnak a si. (French Thufim)

29.Malte sim tikah mifim cun an theithiam cih. (French Thufim)

30.Malte theitupawl in malte lawng an tuah. (Itali)

Thu laknak; Nitin Par

RANG LENG

By  RC Tuallawt

Kalaymyo Aungtitsa vengah khin rualpi pakhat ka nei. Annih hin Rang Leng an neiih Kalay- Tahan le a kiangkap khua pawl ah thilri rit zetzet phur in sum an hawl theu. Veikhat cu an thil phur mi a rit tuk thawn an Rang le tarlam a rak si thawn a bang tuk, a thilphurh mi dir thei loin a hmunah a thi cih. Rang hi ka rak zangfah dah emem lo nan, cui tum cu ka zangfah zet. Rangleng hi ziangvek a si ti simfiang tul loin kan thei cio ding ka zum.

 Rangleng hi an rak hmannak a rak rei zet, Bronze (Dar) age le Iron age san lai ihsin an rak hmang zo. An hmannak bik cu raldoawknakah an rak hmang bik. Hlanlai Rom-pawl hi Rangleng hmang nasa pawl cu an rak siih, doawknak ah an rak hmang nasa. A hmin khalah ‘car’ tin an rak ko. Rang pahnih dirh mi leng cu ‘biga’ an tiih, Rang pathum dirh mi cu ‘tirga’ tiin le Rang pali dirh mi cu ‘quadriga’ tin an rak ko. Jesu suah hnulam cun doawknak lawng siloin thil phurhnak lamah an run hmang vivo. Rangleng hi a tuah daan ih zirin thil tampipi a phur theiih, a thupi zet mi cu a dirtu a Rang sawn kha a si. Ziangtlukin thil phur tam thei in tuah hmanseh, a dirtu Rang kha Rang cak lo, Rang tar tivek asicun zianghman sullam a nei cuang lo.

Cuvek thiamthiam in tulai zumtu nun khal dircaitu parah thumaw in cak le cak lo kan um vivo. Mihrek cu kawhhran ih an pek theinak in a dirih, mihrek cu mino lamih hruaitu an sinak in a dir, mihrek le khawsungih hruaitu an sinak in an zumtu nun a dircai ih, mihrek le minung mithmai zohnak tivek in a dircai hai. Cubangih in dirtu cu tikcu a ra rei in Rangcak nawn lo le Rang tar cau vekah rung cangin hman tlak lo, sawr tlak lo zumtu nun le zumtu nun cak loah a rung cang theu. Curuangah kan zumtu nun in dirtu dingah, thil dang hmang loin, bang ve thei lo, tar ve thei lo le cau ve thei lo kan Bawipa Jesu lawng kan hmang asiahcun kan zumtu nun hi a cau meimei thei lo ding.

THEIH KAUH NAK

 By: Thawgte Pa

SEIKO-5 NAZI
 Leitlun ralpi vei (2) nak tumah Britist Cozah in Japan ram pumpi siatsuah dingah, Lawngpi tumbik thawn a pok ih, a tlunah Jet-Fighter tampi a phur. An tumtah mi cu Japan minung hmuahhmuah thah le a ram leilung tifinriat ih pil tir hi a si. Cuti an feh rero laiah Japan ram mipi cu tih le khur in an um. Culai fangah an ram aiawh in fala pakhat cu Jet-Fighter thawn a pokih, Britist lawngpi meikhu suahnak ah a zam lut. Cuisin lawngpi khal a siat ih, fala nu khal a nunnak a cem ve. Britist ih tumtah mi khal a hlawhsam tariai. Cutin Japan ram mipi khal lungawi aipuang in khua an sa. Japan Cozahpi in an ai ih thi fala nu hmin hngilhlonak ah Nazi Company an din ih, cui Company hmin ah Fala nui hmin SEIKO-5  an bun.
SEIKO-5 nazi hi tutiang ah leitlun ih nazi thabik pawl a si ringring lai.

Budist Sakhua Suahnak
A hmusuaktu cu Gaudama a siih, a din kum cu B.C 500 ah a  si.
Tui hlan India khawpi pakhat (tu ah cun Pakistan a si zo) ah siangpahrang pakhat a rak um.  Cumi cun fapa a nei i, a hmin ah Gaudama a si. Gaudama cun a nupi le a fate cu zan ah tha ten a zoh ringring ih cutin a suahsan. Hmun pakhat ah a feh ih, zianghman ei lo in Pathian a hawl. A rilrawn dan cu a pumpi hi a zaang lamah a bet thei ti a si. Thingkung hnuai ih a to laiah, itthat thangharh vekin “ka hmu suak zo” tiah a au ciammam. Cutin Budist sakhua (biaknak) a dinih,  a dungthlunpawl in Pathian ah cohlang in an bia. A netnak ah vok rang sa a ei sual pangih a thi. A thlan kiangih fehtu pohpoh in, an upatnak ah lungto an sep ciau ih, cui lungto cu mawng liailiai in a um. Cui lungto an seh khawm mi zum ziauziau cu cawng in hmun tinah purang(pura) an din.


Beidong Duh Loih Hlawhtlingpawl

1.Abrahan Lincoln : A nu in a sentet laiah a thihsan ih, a pa thawn nunhar hnianghni ten meihawl rawhih pumcawm aw an si. Tawngkhal kai lo asiih,  President a cuhnak ah vei (8) a hlawhsam, a netnak ah a hlawhtling ih U.S President (16)nak, sal suah zalentu le tuisun ni tiang khawvel in a ngaisan mi ah a hung cang.
A tongkam-
Zokhal hlawhsam dah lo cu thil thar a tuah dah lo tinak a si.
Mi pakhat ih ziaza theih na duh ah cun thuneihnak pe aw!
Daihnak neih na duh ah cun hminthannak kha hrial aw!
Nuamnai ten ka feh nan dunglamah ka kir dah lo.
Kan tuah thei lo mi thil kha mi hnenah thu kan kam lo pei, cu ti lo cun kan tuah thei lo mi tuah dingah, kawh kan si pang ding.

2. Beatles : Studio ah aw khum an tumih, recording neitu in an aw a tha lo tuk tiah an hnongih, Album hman an suahsak duh lo mi an si. Beidong lo ten an zuam tento ih, a netnak ah cun leitlun ih Music Band larbik pawl ah an cang.

3. Albert Einstein : Kum (4) a ti tiangah tong a thiam hrih lo. Ca a thiam lo tukih, Saya pawl in tlawngkai loin a duh mi hna dang tuan men seh an timi pa a si. Asinan beidong loin a zuam tento ih Microsoft tuah suaktu le Noble Prize tiang ngahtu ah a cang. Santhar Scientist mi ropi, mi zovek khalih theih mi ah a rawng cang.

4. Thomas Edison : Electrict power tuahsuaktu asiih, a hlawhtlin hlanah vei (2000) lai hlawhsam in caan a rak hmang. A rualpa in na hlawhtlin hlanah veiziat saw na hlawhsam tiih a suh tikah, a ni cun, veikhat hman ka hlawhsam lo, electric power ka tuahsuahnak ah step vei (2000) ka pal men sawn a si a ti.
A tongkam -
Hlawhsamnak i ruangih beidongpawl in, ziang tlukin hlawhtlinnak ka naih zo ti an theih lo ruangah a si.
                 

ZU THUHLA BIBLE IH A LANG DAAN

                                                 By; Salai Bawisiamthar Sunthang
Thuhmaihruai
Kannih Laimi cu Pathian nung a bia mi Khristian, Bible ih rinnak a thumaw mi kan si bangin Sabitti/Zu thuhla,  Bible ih a langdan-pawl zohtlangnak kan nei ding. Bible san lai ahhin tulai ih zu, laizu/ mirang zu tivek, zu hi a phunphun a rak um hrih lo. Bible sungih zu kan hmuhbik mi cu SabitZu(Wine), grep rah ihsi an tuah mi a si. Hebrew tong cun “Yayin” (Wine) ti a siih, kan lai tong (Falam Bible)ah cun sabitti/zu tiih kawh a si tlangpi. Kan Bible Thukam hlun le tharih a langdan a tlangpi in kan zoh tlang ding.

Thukam hlun lamih a lang dan
Gen.14:18 ahhin duhsakawknak le zahumnak langtertu ah Salem siangpahrang Melkhizedek in Abraham kha sang le sabitti keng in a hmuak a  si, ti kan hmu. Isak in Jakob malsawmnak a pek khal ah khan Pathian in “fang le sabitti tampi lo pe seh”(Gen.27:28) tiah a ti a si. Hi tawk ihsi hin sabitti/zu hi thil tha, Pathian hnen ihsi kan dawn thei mi a si ve thu a lang. Thufim 9:5 le Isai.55:1 ah kan Pathian in sabitti cu thiltha vekin a mipawl hnenih pek a duh thu kan hmu. Cun thawiawknak thilhlan hrang khalah sabitti/zu hi Pathian ih pom mi a si(Suah.29:40). Minung thinlung ti nuamtu le lungawitertu khal a si(Sam.104:15; Thus.10:19).

Thukam Hlun ahhin sabitti hi thil tha le duhum, Pathian in a hnenih hlan ding ih a pom mi a si laiah hman dik lo ruangih an parih siatnak thleng pawl le a thatlonak thu khal hmuh ding tampi a um a si.

1. Noah khan sabitti a rit ruangah lawngfangkheh in a it,.. a tupa kanan (Ham ih fapa) in a pu ih camsiatnak a tuar phah a si kha ( Gen.9:20-25)

2.Profet Isaiah in Judah profet le puithiampawl zu an rit ciamco ruangah nasa takin a dem hai a si (Isai.28:1-10),

3.Sabitti/Zu thatlonak le cumi ihsi thiarfilim aw dingih theihternak le kilhim aw dingih thupek khal kan hmu a si ( Thuf.23:31).

4. “Zu le sa pham mi pawl va kawm hlah. Ziangahtile zu pham le sa pham mi pawl cu an farah ding; na tikcu le caan kha ei le in lawngin na cem ter asiahcun, a rei hlan ah puansia na sin ding” (Thuf.23:20-21).

5. Remawklonak suahtertu le tuahmawhawknak khal a si( Thuf.4:17). “Zu in cu mi hmuhsuam tonnak a si; tongkam a tam terih tawhawknak a suak ter, zurit cu aat a si ( Thuf.20:1)

6. “Siangpahrang in zu in ding a si lo, zu hiarnak nei ding khal a si lo. Ziangahtile zu an in tikah daan kha an hngilh ih mi nunhar pawl covo khal an thei nawn lo” (Thuf. 31:4-5).

 7. “Nan cem a si! Zingpit nan thawh veten zu nan in ih zu nan rit ruangah zanlam tlaipi tiang nan meng. Nan puai caanah tingtang le khuang le phirivau nan tumih cule zu thawn nan ciahaw. Asinan BAWIPA in ziang a tuah ti nan thei thei lo. Curuangah sal kaih mi ah nan cang ding” ( Isai.5:11-13).

8. “Nan cem a si! Zu palang lamah micak pawl! Zu a phunphun rawi lam ah cun ral tha le tih nei lo pawl nan si” ( Isai.5:22).

9.  “ Bawipa in Aaron hnen ah, sabitti siseh zu siseh in tahrat in ka umnak puanthlam sungah nangmah le na fapapawl nan lut lo pei. Nan lut asile nan thi ding (Pui.10:8-9).

10.  Mipa siseh nunau siseh Bawipai hrangih a pekawk le thutiamnak a neih lai ah sabitti le zu a dai ding a si lo( Mipum.6:3).

A tlunih kan tarlan mi ihsin sabitti/zu ih thatlozia le a thatnak maltete um vekin lang khal sehla a tihnun zia le kilhimawk a tul zia  hmuh tel theih a si.

Thukam Thar Lamih A Lang Daan
Thukam thar khalah sabitti/zu ih thatnak le that lonak kan hmu veve thei. Galili ram Kana khua ih nupi thit puai ah khan mi zapi ih in dingah sabitti/zu a zem in an zem ti a langih, kan Bawipa Jesu khal in dawn lam loin, an sabitti a cem tikah tidai kha sabitti ah a canter sawn thu kan hmu (John 2:1-11).  Sabitti hi mipi ritter duh ruangah siloin puai caan ih lakphak kan zemawk vekin an hmang a si.

Cun, sabitti hi damnak sii hrangah hman a si thu fiangten kan hmu thei fawn. Samari mi tha thathim thu ah khan suamhmangpawl ih kaih a tuar mi pa ih hliamhma ah khan siti le sabitti hnih a si thu kan hmu (Luk.10:25-34)

Paul in Timothy hnenih ca a kuat mi ah hitin a ngan fawn: “Tidai lawnglawng in loin na pum na le na nat dang nuam deuh dingah sabitti maltete in rak hmang aw” ( I Tim.5:23).

A thatnak rel ding a um rualrual in kan ralrin a tul zia relnak khal tampi hmuh ding a um fawn a si.
 Apostle Paul cun:
1.Zu ri hlah uh; zu cu a lo siatsuahtu lawng a si. Cuhnakin thlarau in khat sawn uh!” (Efe. 5:18), a ti a si.
2. Paul thotho in zumtu kan nun dan ding a relnak ah, “sun khawvangih a um mi kan si bang tukin kan nun ziaza cu mawi ter thlang uh si: awnau celcel le zuri sabah in um hlah uhsi;” (Rom 13:13) tiah a ti a si.
3. “Nan unau rilhbahnak a suak tertu cu ziangbangtuk thil a si hmanah tuah lo a tha sawn; sabit zu in lo le sa khal ei loih um a tha sawn.” (Rom 14:21)
4. Paul in Galati 5:21 ah cun zumtupawl ih kan ti lo ding mi a rel mi tampi lakah, “zu ritnak, zu hmun ih nomnak” tla a rel tel a si. “Cubangtuk a tuahtupawl cu Pathian uknak an co thei lo ding”, tiin a rel fawn.

5. Korin khua ih zumtupawl hnenah zumtu tiaw si zurit hmang cu kawm lo ding le cubang pawl hnenah cun rawl khal ei lo ding tiangin a sim hai a si ( I Kor.5:9-11).
6. Kawhhran upapawl cu zu in le zu rit hmang mi an si lo pei tiih ngan mi khal kan hmu fawn a si ( I Tim.3:8; Titas 1:7; 2:3-5).

Sabitti/zu hi Thukam Hlun le Thar ih minungpawl hin an rawlhmeh pakhat vekin an rak hmang. Kannih in tihang tello ih rawl dawlh har kan ti vek deuh hin sabitti/zu hi rawl an ei caan poh ah a tel ve theu a si. Jesu le a dungthluntupawl zanriah netabik an kil tlang lai khalah khan sabitti an in thu Bible ah kan hmu a si.

Thu Netnak
Sabitti asilole Zu hi “a in daan kan thiam cun a poi lo, a mahah sualnak a um lo, kan hman thiam lo ruangah si” tivek tla in rel mawi kan tum theu. Asinan kanmah laimi lak lawng hman ah silo miphun dangpawl lak khalah zu in thiamtuk tivek hi an um lemlo. Malte tal ri miah loih in khal thilcang thei mi a si lo. Paisa heu miah loih in theih mi khal a si fawn lo.

Kan rel zo mipawl ihsin kan Bible khal hin Zu in hnakin, in lo a thatsawn zia fiangtein a lang zo. Kan hriselnak siatsuahtu, kan zahumnak ti hlotu, innsang buainak thlentu, accident rapthlak taktak thlentertu, laimi in ti mualphotu, kan nun ti tawitu le harsatnak a phunphun in thlentu zu hi in/ri hlah uhsi!

2017 LAI KUM THAR (Fanger) le K.C.P TIN JUBILEE THLIRSALNAK

2016-2017 Secratary - Salai David Sui San Thawn

Puai programne Ni 3 sung hman a siih, puai nipi bik sun khawmah K.C.P rak dintu pawl hmaiah to ter in, upatnak langter a si.

Khawm caanih Chair&Sermon tu pawl
Zankhatnak Chairman - Salai Nawl Hre Sermon - Rev. A Zung Luai
Zanhnihnak Chairman - Salai Ro Lian Sermon - Rev. Iang Luai
Sunkhawm Chairman - Salai Bawi Sawn Sermon - Rev. Van Hlir Mang
Zan neta bik Chairman - Salai Za Biak Lal Sermon - Rev. Țha Nei Thio

Hla Laam: Khampat Falam Phunsang Tlawngta pawl in. K.C.P mawi tertu ding kan si ti thei in, Usher  tuanvo la in, Hla Laam mawi zet thawn mi an vun awi cu ka zoh khop thei lo. Ka rak dawt zet mi Phunsang tlawgta hmin in hla laam mawi zet tla ka vun hmu thei cu ka sunmang a kim ter in, hmun dang ka ngai ce lo.

Singer Star Zuamawknak

- Hmin petu hi mi pahra (10) cekci an si ruangah Top 10 hril ttul lo'n Top 5 an zuam aw cih. 2017 K.C.P Singer Star Winner cu Mai Zung Iang a si. Pahnihnak - Mai Lal Biak Hnem
Pathumnak - Salai Ram Lian Thawng Hminsin: - Bulpak in siseh Pawlkom pakhat khat in siseh K.C.P Star kan neih mi pawl hi somso/ somnung thiam vivo cio uh si.

Hla Rem Zuamawknak: - Group tin hla rem zuamawknak a umih, Pakhatnak - C group Pahnihnak - B group Pathumnak - A group
Awnmawi - Awnmawi lam hi K.B.C Music Group in tuanvo an laih, an tum thiam in ngai a nuam nasa.

Judges

- Judge hi Salai Biak Lawm Zual in a ho ih, a nih hi 1982-1987 ah LaiRawnPar Music band ah Lead-Guiter tum in awnmawi khawvel ah rak thaw zettu a si. Judge Salai Khua Tin Hre hi 1982-1987 ih singer Star a rak si ve. Judge Salai Lal Ram Cuan hi Hla le Biazai lamih paih zet mi a si.

Zirsang Sunlawihnak - Hi ttumah K.C.P in phunhra ong mi (20) le Dergree ngah mi (8) le doctor kan neih mi Dr. Van Ro Piang hnenah sunlawihnak Capi pek a si.

Ei le In - Puai ruai ttuantu hi Salai Ro Lian le Salai Sum Lian ih hohanak in Vok 440000 man le 270000 man Vok pahnih thah a si. Harsatnak le buaibainak um riai lo'n ruai ropi zet mipi in puar le tlai zet in caan kan hmang tlang.
Lehpannak - Game President Salai San Mang ih hohanak in zuamawknak a phunphun tuah a si. Group laksawng dawngtu
Pakhatnak - B group(A) Pahnihnak - B group(B) Pathumnak - A group(A) pawl an si.

Sponsor thu: Tuikum K.C.P hin sumpai a neih mal deuh ruangah laksawng pekawknak lamah harsatnak a tawn laiah Salai Bawi Siam Thar le Salai Dr. van Ro Piang in singer star zuamawknak cu in sponsor ruangah an parah kan lung a awi nasa. Group tin hla zuamawknak khal Salai Van Bawi Thawng le Salai Sui Ling in an run sponsor thei lala ih kan lugawinak a sang sinsin. Cui tlunah K.C.P Singer Star Pakhatnak ngahtu cu Salai Tha Tin Ceu in Ks. 10000 a hlan bet cu a ropi in a sunglawi kan ti nasa a si.

Hi puai ttumih sumpai hman mi hi 939000 a si.
Thunetnak - Tuitum fanger puai kan hman daan hi a thianghlim in a manhla nasa. Hihnakih nuam sinsin ding cun sumpai le Hall kan ttul rori a si. Hi puai hi Video Live in KCP group ah thlah a siih ramsung/leng ih um mi K.C.P member pawl in an rak zoh thei hi an di a riam ve nasa ding. 2017 fanger puai cu nuam zet le siang lo cing ten kan hmang liam ta a si. 2018 laikumthar ding khal a hngahhlap um nasa a si.

Ca Kan Siar Pei

📚 Pathian lam hruainak in K.C.P a din ni thok isin tuisun ni ah kum (10) kim in kekarnak le cangvaihnak neih a si. K.C.P daanbu sungih a um bangin Sub-Committee din bet theih vivo a siih, cu mi lak sung isin CALAI COMMITTEE (Literature) tla dinsuak in, cangvaihnak thok rero a si thlang.  Calai Committee in a suah mi ca hmin ah cun K.C.P TLANGAU tiin hmin bun a si. Leitlun thuanthu kan zoh asilen, ca siar tam mi le ca a ngaina mi miphun le ram cu an thangso in, midang tlunah an um ti kan thei ding. Thufim pakhatah cun, “casiar dah lo mi hnakin, casiar theu tui’ nun cu a mawi in a tha sawn” ti a si vekin, kan nuncan in rem tha tu dingah ca siar a tul. Cabu dangdang kan siar thei lo asihmanah, kan mai’ ta a si mi K.C.P Tlangau tal hi cu siar ciau zuam uhsi. A sungih um mi kanmah hmanih kan siar lo cun, zo in saw in siarsak cuang ding. Ziang tinkimih kan thanso theinak dingah ca kan siar pei uh!