MI LUNGAWI SI NA DUH MAW ?

( Cangthlan ; Saam 37:4 )   

       By : Cung Sin Mang ( Royal Mangte )

 Mi zokhal mi lungawi si kan duh cio. Asinan kan duh bangin kan lung a awi thei lo. Lungawinak kan ti rero mi hi neih nung, milian hrang lawngah a si lo. Milianpawl ta si bang sehla mi farahpawl cu dam sung thinnuam le lungawi in an um dah lo ding pi.

Mi zokhal kan duh bangin thil a cang thei lo pi maw! Lungawi theinak lamzin pakhat cu kan duh vekin thil a cang thei lo nan a cang suak mi parah a thabik ih cohlan thei hi a si tiah Jennie Jerome Churchill in a ti ve.

 Lungawinak kan ti rero mi hi lam hlapi khalah a um lo. Hmun dang ih hawl rero țul khal a si lo. Lugawinak cu mitin in kan nei țheh cia a si. Paula A.Bendry in mai sung hmanah hnangamnak kan hawl hmu thei lo a si ahcun khui hmun ah saw kan hawl hmu nawn ding tiah a ti.

Kan mah sung hmanih lungawinak kan hmu awk thei lo ahcun hmun dangah cun kan hmu thei sinsin ding sawm..? Kanmah si a thupi. Curuangah lungawi kan duh ah cun kan lungawi thei thotho.

 Kan hringnun ah ttahnak ding phuahhlam tamtak ra thleng khal sehla, hnihnak ding phuahhlam phunkim a um ve ding ti a si.

Kan nunnak ah thlemnak maktara ra thleng hman khal sehla, tlansuahnak ding cu a um thotho ding.

 A famkim mi hringnun, duhkim ttheh ti a um thei lo. Asinan lungawi na duh ahcun lungawi cu a theih thotho a si.

Hni siamsi te ih mit hmai um tu pawl khi thinharnak le beidongnak an nei lo a si lo. Cui thil pawl cu an neh suak thei sawn a si ( Shakespeare ).

 Lady Marguerite Blessington in .. Lungawinak kan timi cu tampi neih ruangah a si lo.Malte sikhalsehla neih tawk ih lungawi thiam hi a si tiah a ti.

Mi lungawi si thei ding cun can tawk parah lungawi thiam le mai sinak parih lungawi thiam hi a si. Neih le neih lo lamah a țhum aw lo. Cui thu cu Habakkuk in a thei fiang tuk ih hitin a ngan .... “Theipi in rah an neih lo ih Sabit hri ih sabit a rah lo hmanah, Olif kung ih olif rah an siat ttheh ih, Lo in rawl a suah lo hmanah, Tuu pawl an thih fai țheh ih, Caw inn tla an lawng țheh hmanah, Ka lungawi in ka thin a nuam thotho ding; Ziangahtile Bawipa Pathian cu i runtu a si” ( Hab 3:17-18 ).

Mi lungawipawl cu an neih nung ruangah si sawn loin an can tawk parah lungawi an thiam sawn a si. Saam Hlabu 37:4 “Bawipa ah na lungawinak hawl awla, Na lungthlitum a lo pe ding”.