HNGAKȚAH FAHNIANG Part(2)

By;Val Sen

March-April 2018 ta peh..

'Khi nauhak khi nauhak ka hmuh mi ah cun zangfah um bik a si ding. A pa hi zuu tama a si hlei ah sii a tham ruangah kaih tawng in thawng a tla. Thawng a tlak sungah a nu in pasal dang a rak neih san lala. Cuihnu in an nih nupa khin an cawm ta a si. Kum nauhak zet a si nan inn sungsang ttul mi hmuahhmuah khi a tuah thluh si ko, cu cing in kawk le thawi a tuar ringring. Rawl rori hman duhvek in a ei tha ngam lo a si bik. A nu ei khin a hmuhsuam zet ih, Bawite khi amai fa le hnak in an upa sawn nan, zianghman tuah a siang lo. Kum 6 lawng si cing in khi bang hnatuan khungkhai a tuan thei hi zum a har zet. Hmanseh thungai a sisi. Khi bang kum nauhak hrawng cu Nu le pa pawk le cawi, pawm le duat an ttul zet lai caan a si nan, anih khi cu pawk ai in vuak a co ih, pawm hnak in hnawl a co ih, duat timi sullam khal a thei nawn zik lo. Tuk a sum sawn lamlam. Aw.. amai khukhri rual pawl thawn tlanlen, nu le pa'n duat le duhdawt zet ih zoh tu neih ve tla a duh ve zet ding nan......'cui putar cu a tap suak ih,a rel peh thei nawn lo.
"Cui thu ka theih mi pawl cu thuphan a si lo ding ti ka fiang ih, inn ka thlen veten ka nupi hnen ah thu um daan pol ka sim thluh. Anih khal in a rak zangfah tuk. Kan nupa hin kum 7 kan nei aw zo nan Nau kan nei thei lo. Cui nauhak zangfah um zet cu fa ih la ding in ka rel pi tikah i el ve lo. Caan tha neih hmaisabik ih va bia ding in kan rel. Cui nauhak cu a damsung hmuhsuam a tong ding cu kan siang lo"
Zanlam ruah a sur ruangah tumtah vek in kan va feh thei lo ih, a thaizing kan va thleng tikah, cui nauhak pate cu puan pate sin cing le tthia derdo cing in tohkham par ih a rak it kan va hmu. A tak ka vun tham cu a rak sa nasa. Ka vun bia nan theih hmel khal a pu lo. Hi vek ih nauhak khuasik nasa tuk khal ngaihsak lo le puan pate men sin tir ih an um men thei cu ka ngaihdaan a si nawn lo. Ka rualpa'n hnenah cun "hi tluk lawmam in si maw na rak sual, nauhak men a si lai hi, zangfahnak mallai cu lang ter ve hmen uh" ka thinheng tuk ka vun ti. Cutik ah ka rualpa'n nupi cun "a zet tukah si kha, ra thang hnikseh thawi deuh a ttul si kha" a run ti betbet cu ka thinheng tuk ka puakkuai lo fang. Ka nupi in a mit in i run dawn lo sehla cu ka beng fukfi men ding. Siizungah kan vun hruai cih cu, Sayavuan in hi tluk damlo nasa si Sizung kan fehpi har tuk cu in rak kawk nasa. Siizung hmai tualrawnah ka nupi si, ka rualpa si kan to tlang hai. Ka rualpa hnen ah cun fa ih lak kan duh thu ka vun sim. A thawkah cun a siang lo nasa. Hmanseh rei nawn kan biakawk hnu cun rem a ti sal. Bawite hihi kan inn sungsang ih na ra thlen thawknak a si."
Cui ca cun ka ruahnak a ti buai zet. Ka pa in Bawite a ti mi cu zo asi ti ka thei lo ih, cui nauhak Bawite cu keimah ti zik sehla kan hming a bang aw si lo. Ka theih lo in midang cawm mi nauhak dang an rak nei ding ih, sim duh lo in, tuvek in ka Pa in ca ah ngan in a ret tha sawn saw? Ziangkhal sisehla cubang duhdawtnak ih khat nu le pa ka nei cu ka uang aw zet.
Ca hnah pakhat lawng a tang zo... ka vun siar peh sal... "Bawite, Doctor in na hminsinnak le na cinken theinak na hloh thluh ti thu in sim tikah na Nu thawn ka sup aw thei lo, poi ka ti tuk. Na luu ih an lo thawnnak ruangih hlo ti thu in sim phei cun tayacuai mei kan duh. Hmanseh kan hrang tha sawn dingah Pathian in rem a ruat sawn a si hi tiin daiten kan um sal. Cui ni ihsin thok in, nun thar, sungkua thar in na um thlang ding ruangah le na nun hlun cu na cing ringring lo nak dingah na hming cu "Van Lal Ruat" Ruatte tiin kan thleng ta a si"
Ka lung a mit sutsi, ka luu a zing hlei ah ka tha hmuahhmuah a cem thluh vek in ka um. Keimah hi maw cui nauhak hmuhsuam nautatnak ih tthangliantu cu. Si lo, a cang thei lo.... ka mit ihsin hnul cawk lo mitthli a ra luang. Ziangtin si hi vek ka theithiam lo dingmi thil a um?. Siar peh ka duh nan siar peh ding a um nawn si lo.
Ka hminsinnak a hloh ruangah si ko ding kum 6 ka si hlan ziang thuhla hman rel ding ka thei lo. Ka nu le pa'n in sim theu hmanseh ka cing lo. Kha hmuahhmuah in sim theumi kha an rak phuahcop men a si ti ka vun thei fiang. Ka cau tuk ah ziangtin ka rak itthat ti khal ka thei aw lo. Ka ra thang sal cu Ni a rak suak zo. Ka khawlh aw fai hnu ah zan ih ka siar lo malte a tanglai mi ka vun siar peh.
"Ruatte,himi hmuahhmuah hi na nu thawn kan lo sim lo nak san cu na nunhlun harsa zet kha na theih kan duh lo ruangah a si. Kan lo kilkhawinak ah fa vek rori in kan lo zoh. Kan nih hin fate rak nei hmansehla nang kan lo duhdawtnak hnakih sang cun kan duhdawt thei cuang zik lo. Thudik cu lo sim lo hmanseh ni khatkhat ah na theih ni a um leh ding ti ruahsan in, hi ca hi ka ngannak san cu a si. Thudik na theih hnu khalah thinnau, thinnaa le thinhar in ra um,hrimhrim hlahla, duhdawttu nu le pa in rak nei dah zo ti run thei ringring aw. Manhtha ka fapa" ~~~~~~~~ Ka pa'n thlan thar zet le ka nu'n thlan hlun zik nawn hmaiah cun ka ding ih, an thisen suak hman si lo, duhdawtnak thawn kilkhawi le cawm pitlingtu ka nu le pa tluk ih upat ding le uar ding dang ka nei lo. "Ka nu ka pa kei hngakțah fahniang duhdawtnak thawn kilkawi ih cawm pitlingtu, nun timi sullam in theih ter ruangah ka lungawi. Kei hi leitlun ah voi tampi suak sal in um hmansehla nannih hnak ih tha nu le pa ka tawng cuang lo ding.
A cem ta.