THIL PEK

BY/ RC TUALLAWT

(Nunau hmuahhmuah lakih ka duh bik, ka uar bik le mawi ka ti bikmi ka farnu lai fala pawl hrangah)

TAWN SUAL

Khuitawk in in thlun thawk ti ka thei lo. Biakinn ihsin ka suah pekah kha cun ka hmu lo. Hmanseh Ka rualnu in an inn zin i pial san hnu deuh in, ka dunglam pi20 hrawng i hla ah in ra thlun thawk in ka thei. Tih cu ka ttih lo. Zan thim lakah ka dunglam ih mipa pakhat feh ve cu ka hna a ti ngam sawn riangri.

Kan inn zin kawi ka thlen veten a ra feh cak thutthi. Zu rim a nam huamhi. Ka dunglam ka vun zoh cu i rak naih nasa zo. Ka ding ih, feh lan ter ka tum. Ka ti sual nasa. Ka kaa a run hup, ka cang man lo. Ka kee a phet, ka tlu tupti. Ka Bible ken laimi ka thlau. Ka hni fehmi cu a dir tla ih, in pawngsual ta a si.

VANSIATNAK DAWTHNIH

Fala pitling ve nawn zo ka si. Keimah in harsatnak tam nawn ka pah tlang ve zo. Mah le mah rinsan awknak khal ka nei zet. Hmanseh hivek vansiatnak hi cu ka rak ruat ban dah lo. Ka sungle sim ka duh nan, ka sim ngam lo. Ka thin natnak cu mahten'n tuar suah ka hril sawn a si. Zan ithmu ka khawp dah lo. Ka sungle pawl theihthiam lonak ding fang in rawl ka ei. Ka room ah ka khum awaw ih, ka thinlung le thlarau cu hliam nasa zet tuar in a um. Mitthli le thinhengnak cu ka rawl thaw bik a si.

Thlakhat lai a vun liam hnu cun ka tuar khal dem vivo in, kel ka awh zik rero. Hmanseh vansiatnak dawthnih cun in nen bet sal lala. Fa ka vawn.

Ka pum sungih naute cu duhdawtnak hnatuan a si lo. Ka ruahnak ah cun Khuasia fa a si. Hmanseh ka fa a sisi. Hlawn sehla zonih mawh in ti ding? Pathian hman in hawh in ti ding maw si? Ka thei lo. Hmanseh ka theih mi cu keimah le keimah ka thiam aw thei zik dah lo ti hi... Sile ka sungte'n hnenah ziangtin ka sim ding? Ka thil rak tawn mi le ka rak thup zo si. Mihur maw ka si? Fanu santlailo, sungkua mualphoh tertu men maw ka rak si ding? Maw, Bawipa i bawm hramhram aw. A thokpek ih thil umtu dan ka rak sim lo kha pawi ka ti tuk lawmam. Hmanseh tu ah cun a tlai zo si.

KA PA IN NGAITHIAM AW

Thup theih a si nawn lo. Ka sinak dik ka pum cu a nini in a puar deuhdeuh. Ka pa'n a theih cun ziang rel lo'n ka hmai ah i beng fukfi. Ka nu'n rak kai lo sehla thah i nuam men ding.
"Pa i ngaithiam aw, ka mawh a si''.
"Khai, khuasia fa kha hi inn sungsang hin a duh lo. Thaisun ah na nu thawn va thlak uh''
"Sihlah e, hi naute hi ka nei ding''
Ka biang i a luangmi mitthli hi a thianghlim a si. Cu cu van nih i theihpi a si. Kohhranah theitawk hnatuantu ka si. Nauhak sunday school ah zirhtu, mino ah mino sum kiltu. Hmanseh tuah cun cu pawl khal tuan tlak lo ah ka cang. Sungkua in dawisuah ka si lo cu lungawi ding ka si.

A RA SEM SUAK

Siizung itkhun dai ttiamttiam ah ka it. Ka nu cu ka kiangah a to. Ka kut ttawl zet cu kai in, i cul rero. Leitlun hin in dawisuak hmanseh ''Nu'n duhdawtnak cu a sang tuk e''. Zan nazi 2 hnu deuh in ka fanu cun hi leitlun tleu cu ttap cing in a run hmu ve. Ka vun zoh, ka duhdawt a si. A nihkhal in ka mit ah i run zohih, ''Nu i kai hnget ringring aw maw'' ti'n ka thinlung ah i run sim vek in ka thei. "Duat, ka lo duhdawt. Ka ta na si. Ziangtik hmanah ka lo thlah lo ding''.

NUNNAK

Ka fanu ka zoh rero laiah ka luu a ra zing. Ka lung a mit tum. Ka tai a ra naa nguingo. Ka thawthawt a har deuhdeuh. Ka nu'n mangbang cun Sayavuan a ko. Cutin room dangah zamrang ten in tthin. Cutin zianghman thei nawn lo in, caan ziang maw ti zat ka um.Nau nei pek ka si ruangah thisen ka nei mal tuk. Tuihlan ihsin ka lung(heart) natnak cu nasa zet in a rak siat tikah ka nunnak cun thihnak lamtluan cu zawh a rak tum rero hi a rak si.

THIL PEK

Siizung in kan suah hnu, thil umtu dan cu Sayavuanpa nih in sim sal. Oxygen tla in rak peih, ka Lung cu nasa tuk in a rak siat zo ruangah damsuak thei nawn lo dinhmun hi ka rak si. Hmanseh mi zo simaw cun a Lung in rak hlu(pe) a si cu. Hibang mai taksa petu hi an hming thup ttheu a si nan, i petu in sim sal ding in zangfah a rak dil hi a rak si. A hming cu Bawi Cin Thang a si. Ka fanu a suah ni a thai zan ah khan a rak thi. Siizung room pakhat ah a rak um. Savuanpa cun ''hihi rak pe aw in ti'' a tiih cahnah pakhat i pe.
Cahnah cu ka vun siar tkiah '' Mawite, i ngaithiam aw maw.... Ka fanu kha ka duhdawt tuk ti rak sim hram aw'' tilawng i a ngan aw.