Tuisun ni tiang Pathian lamhruainak in kan miphun tla khuasa thei le cangvai thei in kan um hrihlai ih leitlun ah miphun cu tam zet kan um ko, cumi lakah kannih falam miphun te hi kan Bawipa in dungtun sianglo le tan sianglo ten in kilkhawi hrihlai tla hi a sunglawi tukmi a si. Cutin kan miphun sungah innsang dangdang, unau, sungkhat bang awlo celcel in kan rak um cio. Pathian in lam in hruainakah kan miphun sung ihsin hruaitu hmangin lam in hruai. Cui hruaitu pawl cun kan miphun thansonak ding le cangveih dan ding ziangtinkim cu ruatrel phahin an tlin dan tawk ciarin miphun cu a kaihruai theu asi. Cutivekin kan miphun hi a thansonak dingle lungrual zetih ke kan kar khawm theinak dingah kan miphun hin tulmi tampi kan nei asi. Cui tulmi tampi kan neihmi lak sung ihsin a huailam ih thupi(2) hmangin zohtlannak kan nei ding.
(1)Fimthiamnak a neitu mino
Fimthiamnak timi hi thil thupi zetmi a si. Cule fimnak le thiamnak hi bangaw vekih lang a sinan bangawklonak te an rak nei asi. Fimnak timi cu zir rero ruangih neihmi a silo ih Pathian ih in pekmi ka suahkeh pi a rak si. Tahthimnak ah a suahkeh ihsin mi banglo ih a suak pa cu ziangtlukin zir rero khal sehla zohman in cu pa cu mifim tiah kan ko lo ding. Cuvekin thiamnak timi cu kan nui'pumsung ihsin kan suahkeh pimi a si velo thung, thiamnak cu kan zir rero nak ihsin kan neihmi a rak si. Tahthimnak ah mipahnih cu nui pumsung ihsin suak ve ciocio siin pakhat cu tlawngkai lole caa zianghman zir dahlo in a um ding, culaiah pakhat sawn tu cu nauhakte a silai ihsin tlawngkai in le caa tampi a zirsuak tikah cupa cu caa thiam/thiamnak neitu tiah kan ti ding. Asinan tlawngkai lole thiamnak caa a zir dahlo tu pa cu zohman in caa thiam/ thiamnak neitu kan ti dahlo ding. Mino timi cu kan cahlai, kan mawilai, kan ruahnak a kauhlai, thu kan hminsin theilai, kan thluak a thatlai, kan vanglai, etc. pawl tla hi an si.Kan nolai caan hi duhvek ih kan cangveih thei caan le kan duhmi ka tuah theilai caan a siih kan upat hnu cun kan thinlung ih a duhmi khal tuah thei nawnlo caan a thleng leh ding asi. Kawhhran ah siseh Pathian tihzahtu mino kan tul bangin kan miphun khalhin mino tha kan tul asi. Fimthiamnak a neitu mino hi kan miphun in kan tul zetmi asi. Kan miphun sungah fimthiamnak a neilo mi mino pakhat in peaw zetle taima zetin hna a tuan ih miphun in hruai tikah kan miphun hi kan thangso lo ding maw? tiah thusuhnak a um. Mino pakhat in a tlin tawkte le taimak suahin miphun in hruai tikah kan thangso ko ding na'n cuhnakih a tha sawnmi le a thupi sawn mi, fimthiamnak a neitu mino in miphun a hruai tikah tuhnakih nasa sinin kan miphun kan thangso ding asi. Bible sungih kan hmuhmi Paul le Peter ih nunak kan zoh tlang hnik pei. Peter cu Jesu hmutu tulai tawng kan hmang sile ''live" rori a hmutu, amah thawn um tlang, rawl ei tlang, cutin cann hmang zotu a si. Culai ah Paul cun Jesu cu a mitin a hmulo ih rawl khal an ei tlangin an um tlang dahlo. A sinan kan Bawipa in a rawngbawltu ih a hman veve nakah hin fimthiamnak a nei lemlo tu Peter hnakin fiamthiamnak neitu Paul kha a hman dan a nasa sawn asi. Bible sungih thuthlung thar cakuat pawl kan zoh tikah Peter cakuat ti hnakin Paul ih caa kuat, Paul ih caa kuat ti ringring a sikha. Pathian in a hang thei veve ko nan fiamthiamnak a neitu Paul cu Peter hnakin a 'Area' a kau sawn ruangah Pathian ih a hmannak a nasa sawn a si. Curuangah fimthiamnak a neitu mino tha hi kan miphun in kan tul zetmi asi. Fimthiamnak a. neitu mino kan suah vivo theinak dingah nule pa pawl khalin kan fate hnenah thazang pe in zuam cio uhsi!
(2)Miphun duhdawttu
Duhdawtnak timi hi thil ati thei zetih mi ngaidam theinak khal cui duhdawtnak thotho ihsin asi. Cule misual zet mitha ih tuahtu khal duhdawtnak thotho asi. Duhdawtnak hi a thlum ih hmual nei zetmi khal asi. Duhdawtnak tawngkam cu ngai a nuam ih mi thinlung khal a neh zet fawn. Kan Pathian khal leitlun misual a duhdawt tuk ruangah a fapa neihsun in pe asi kha. A fapa tiang in pek duhnak san cu cui duhdawtnak thotho ruangah asi. Cutin kan Pathian in in rak duhdawt zo bangin kannih khal duhdawtnak kan neih ding hi a duhmi a si. Cule kan duhdawt mi pa/nu par ahcun kan thin a sau ih a hrangah cun kan peaw thei zet fawn. Cubangin kan miphun in miphun duhdawttu hi kan tul zetih mi pakhat in miphun a duhdawt tikah miphun hrangah a pum peaw dingih theitawk suahin hna a tuan ding asi. Cutin tu hnakih nasa sin in kan miphun hi a thangso dingih midang khalih cawn tlak zetmi miphun ah kan suak ding asi. Curuangah kan miphun in miphun duhdawttu ngaingai a tul asi. Miphun a duhdawttu cun miphun hminsiat ding le tumsuk ding cu a siang hrimhrim lo ding. Miphun duhdawttu si zuam vivo cio uhsi!
No comments:
Post a Comment